Сирдарё вилоятининг Гулистон туманлараро суди иш берувчи томонидан маоши тўланмай келинаётган С.Х.га 33 миллион сўмлик қарздорликни ундириб берди. Бу ҳақда Олий Мажлиснинг Инсон ҳуқуқлари бўйича вакили (омбудсман) хабар берди.
Қайд этилишича, омбудсманнинг Сирдарёдаги минтақавий вакили Шуҳрат Алимовга Мирзаобод туманида яшовчи фуқаро С.Х. ойлик маошининг иш берувчи томонидан тўланмай келинаётгани бўйича мурожаат қилган.
Мурожаат ўрганилиши натижасида, С.Х «Мирзаобод чиройи» деҳқон бозори МЧЖда ишлагани ва 2021—2022 йилларда ишлаган даври учун иш ҳақини олмагани маълум бўлган.
Шунингдек, у билан меҳнат шартномаси бекор қилинаётганда 2014—2022 йиллардаги меҳнат фаолияти бўйича якуний ҳисоб-китоб қилинмагани очиқланган.
Фуқаро мурожаати қонун талаблари асосида ўрганилиб, тегишли ҳужжатлар тўпланган. Олий Мажлиснинг Инсон ҳуқуқлари бўйича вакили (омбудсман) томонидан мурожаатчи манфаатида судга даъво аризаси киритилган.
Шунингдек, фуқаролик ишлари бўйича Гулистон туманлараро суди томонидан фуқаро С.Х.га 33 млн сўмдан ортиқ қарздорлик ундириб берилиши белгиланган.
Мурожаатчининг Омбудсманга хабар беришича, унга тўланиши керак бўлган қарздорлик суммаси тўлиқ ундириб берилди.