АҚШ Федерал ҳокимияти уч кишини, жумладан магнит саноатида дунёда етакчи бўлган Quadrant компанияси президенти Пҳил Паскоэни Хитойга назорат остидаги ҳарбий маълумотларни юборишда айблаб ҳибсга олди. Бу ҳақда УПИ хабар берди.
Айбланувчилар ва Калифорния муҳандислик фирмаси Осиё мамлакатида жойлашган компанияга қурол экспортини назорат қилиш тўғрисидаги қонун ва халқаро қурол савдоси қоидаларини бузган ҳолда 70 га яқин техник маълумотлар чизмасини юборганликда айбланмоқда.
Федерал прокурорларга кўра, чизмалар АҚШнинг икки компаниясига тегишли ва самолётлар, сувости кемалари, радарлар, танклар, миномётлар, ракеталар, инфрақизил ва термал тасвирларни нишонга олиш тизимлари ҳамда Мудофаа вазирлигининг ёнғинни бошқариш тизимлари билан боғлиқ маълумотларни ўз ичига олади.
Шунингдек, айбловда Quadrant Хитойдаги компаниядан ноёб магнит элементлари импорт қилгани ва у АҚШнинг иккита компаниясига сотилгани келтирилади. Бу элементлар Пентагонга F-16 ва F-18 жанговар самолётлари ва бошқа ҳарбий техникалар учун сотилган компонентларда ишлатган.
Федерал прокурорларнинг таъкидлашича, Мудофаа вазирлигига сотиладиган бундай қурилмалар АҚШда ёки тасдиқланган мамлакатда ишлаб чиқарилган бўлиши керак. Хитой эса бундай мамлакатлар қаторига кирмайди. Шу тариқа, федерал прокурорлар Quadrant’ни мудофаа сотиб олиш қоидалари тизимини бузганликда айблади.
Уч нафар айбланувчининг ҳар бири фирибгарлик, техник маълумотларни лицензиясиз экспорт қилиш ва АҚШдан контрабанда товарлари олиб ўтишда айбланган, уларнинг ҳар бири 10 йилдан 30 йилгача қамоқ жазосига ҳукм қилинади.
Эслатиб ўтамиз, сентябрь ойида АҚШ Хитойга яримўтказгичлар экспортини чеклашни режалаштираётганди. Байден маъмурияти октябрь ойида Хитойга чиплар ва сунъий интеллект воситалари ишлаб чиқариш учун зарур яримўтказгичларни экспорт қилиш бўйича чекловларни кенгайтириши маълум бўлганди.
АҚШ 2020 йилда Хитой компанияларига Америка технологиясини сотишни чеклай бошлади. Улар орасида Semiconductor Manufacturing International Corp. ва Hangzhou Hikvision Digital Technology Cо. каби фирмалар бор. Бу чора фирмаларнинг ўсиш суръатларини чеклаб қўйди, бироқ ишлаб чиқаришни рағбатлантирди, жумладан йирик Ғарб компаниялари хитойлик ишлаб чиқарувчиларга қизиқиш билдира бошлади, деб ёзади Bloomberg.