Ўзбекистоннинг Франкфурт Майн шаҳридаги Бош консулхонаси Германияда фаолият юритадиган ўзбекистонлик Орифжон Аҳмадалиев, Haus des Stiftens GmbH хайрия жамғармасининг масъул ходимлари Михаэль Симон ҳамда Ҳелена Бликенбергер иштирокида онлайн-мулоқот ташкил этилди, деб хабар бермоқда «Дунё» ахборот агентлиги.
Маълумот учун, Haus des Stiftens GmbH ижтимоий корхонаси 1995 йил Мюнхен шаҳрида ташкил этилган бўлиб, унинг фаолияти хайрия тадбирлари ва болалар жамғармаларини бошқаришга йўналтирилган.
Қайд этилишича, мулоқот давомида Ўзбекистон фуқароларини ижтимоий, моддий қўллаб-қувватлаш, фуқароларга соғлиқни сақлаш соҳасида кўмаклашиш доирасида гуманитар фондлар билан музокаралар олиб бориш орқали Ўзбекистон—Германия тиббиёт жамғармасини ташкил қилиш масаласи муҳокама қилинган.
Учрашув қатнашчиларига Ўзбекистонда ижтимоий ва иқтисодий соҳаларда амалга оширилаётган ислоҳотлар ҳақида батафсил маълумот берилган. Шунингдек, республикада мавжуд хайрия жамғармалари ва уларнинг фаолияти ҳақида тўхталиб ўтилган.
Мулоқот чоғида Орифжон Аҳмадалиев Бош консулхона кўмагида Германияда ўзбекистонлик ногирон болалар учун инсонпарварлик жамғармасини ташкил этишни режалаштираётганини билдирган.
Ўз навбатида, Михаэль Симон ва Ҳелена Бликенбергер ташкил этилажак жамғарманинг ҳуқуқий базасини яратиш, низом ва бошқа ташкилий ҳужжатларни тасдиқлаш, Германия расмий идораларида қайддан ўтказиш бўйича фикр билдирган.
Учрашув якунида томонлар хайрия жамғармасини ташкил қилиш бўйича масалаларда ҳамкорликни давом эттириш бўйича келишиб олган.
Изоҳ (0)