Жануби-ғарбий махсус ҳарбий округ тасарруфидаги Термиз умумқўшин дала полигонида тузилмаларнинг Қуруқликдаги қўшинлар ҳаво ҳужумидан мудофаа бўлинмалари билан ўқув-услубий йиғин бошланди. Бу ҳақда Мудофаа вазирлиги ахборот хизмати хабар берди.
Йиғиннинг очилиш маросимида ҳарбий округ Қуруқликдаги қўшинлар ҳаво ҳужумидан мудофаа бўлими бошлиғи подполковник Дилмурод Шералиев иштирок этиб, қўшинларнинг жанговар тайёргарлик даражасини дунёнинг энг илғор армиялари билан тенглаштириш учун ҳарбий қисм ва муассасаларда барча моддий-техник асослар, ҳарбий хизматчиларга зарур шарт-шароитлар яратилганини қайд этиб ўтди.
Шундан сўнг дастлаб йиғин иштирокчиларининг машғулотларга тайёргарлиги, хусусан, уларнинг қурол-яроқлари, юк қоплари, командирлик сумкалари ва ҳужжатлари кўрикдан ўтказилди. Шунингдек, ҳарбий хизматчиларга махсус ва техник ҳамда жисмоний тайёргарлик жараёнларини янгича усулларда олиб бориш юзасидан тегишли кўрсатмалар берилди.
Мазкур дала ўқув йиғинида ҳарбий хизматчилар мавжуд тажрибаларини янада мукаммаллаштириб, жанговар ҳаракатларни ташкил этишда эгаллаган билим ва кўникмаларини мустаҳкамлайди. Йиғин 16 ноябрга қадар давом этади.
Изоҳ (0)