Андижон вилояти ҳокимлиги ўқувчилардан ҳоким саволларига шукроналик билан жавоб бериш талаб қилинганини рад этди
Андижонда Жалақудуқдаги мактабга ўқувчилар билан учрашишга бораётган вилоят ҳокими Шуҳрат Абдураҳмоновнинг саволларига мактаб ўқувчиларидан шукроналик билан жавоб бериш, «свет» ва газ муаммосидан гапирмаслик, кўзи ёниб, кулиб туриш талаб қилингани ҳақида хабар берилган эди. Вилоят ҳокимлиги буни рад этди.
Қайд этилишича, мактабларда таҳсил олаётган ўқувчи-ёшларни ҳар томонлама қўллаб-қувватлаш ва уларни қизиқишларига қараб йўналтириш мақсадида Жалақудуқ тумани ҳокими Ҳикматилло Латипов иштирокида «Ҳоким ва ёшлар» учрашувлари, очиқ мулоқотлар ва давра суҳбатлари ташкил этиб келинмоқда.
Лекин 2 ноябрь куни ижтимоий тармоқларда тумандаги таълим муассасаларида «Ҳоким ва ёшлар» учрашуви ўтказилиши юзасидан тарқалган хабарлар асоссиз бўлиб, тумандаги мактабларда «Ҳоким ва ёшлар» учрашуви ўтказилиши белгиланмаган.
«Қолаверса, ўқувчи-ёшлар билан очиқ-мулоқот тарзида ташкил этилиши режалаштирилган тадбирларда уларга фақатгина тадбирда одоб-аҳлоқ қоидалари риоя этишлари юзасидан тавсиялар берилишини ва ана шундай учрашувлар уларни фикрларини эркин баён этишлари учун ҳам ташкил этилиши таъкидланади.
Хулоса ўрнида, туман ҳокимлиги ва туман халқ таълими бўлимлари томонидан ижтимоий тармоқларда келтирилган топшириқларни берилмаганлигини маълум қилган ҳолда тумандаги барча мактаб жамоаларига, педагог-устозларига ўқувчиларини сифатли таълим олишлари йўлидаги фаолиятларини самарали олиб боришларини, турли асоссиз хабарлар муҳокамаларига берилмаган ҳолда фақат таълим жараёнлари билан шуғулланишларини сўраб қоламиз», — дейилади ҳокимлик муносабатида.
Эслатиб ўтамиз, ХТВ ҳолатга муносабат билдириб, тизим ходимларини «Аҳмоқона топшириқлар беришни» тўхтатишга чақирганди. Қонунчилик палатаси депутати Расул Кушербаев ҳам бу ҳолатга муносабат билдириб, «Ҳалиям феодал замондамизми, деб ўйлаб қоласан киши: ҳоким халқнинг, ёшларнинг дардини эшитадиган раҳбар эмасми шунда?» — дея савол қолдирганди.
