Andijonda Jalaquduqdagi maktabga o‘quvchilar bilan uchrashishga borayotgan viloyat hokimi Shuhrat Abdurahmonovning savollariga maktab o‘quvchilaridan shukronalik bilan javob berish, “svet” va gaz muammosidan gapirmaslik, ko‘zi yonib, kulib turish talab qilingani haqida xabar berilgan edi. Viloyat hokimligi buni rad etdi.
Qayd etilishicha, maktablarda tahsil olayotgan o‘quvchi-yoshlarni har tomonlama qo‘llab-quvvatlash va ularni qiziqishlariga qarab yo‘naltirish maqsadida Jalaquduq tumani hokimi Hikmatillo Latipov ishtirokida “Hokim va yoshlar” uchrashuvlari, ochiq muloqotlar va davra suhbatlari tashkil etib kelinmoqda.
Lekin 2-noyabr kuni ijtimoiy tarmoqlarda tumandagi ta’lim muassasalarida “Hokim va yoshlar” uchrashuvi o‘tkazilishi yuzasidan tarqalgan xabarlar asossiz bo‘lib, tumandagi maktablarda “Hokim va yoshlar” uchrashuvi o‘tkazilishi belgilanmagan.
“Qolaversa, o‘quvchi-yoshlar bilan ochiq-muloqot tarzida tashkil etilishi rejalashtirilgan tadbirlarda ularga faqatgina tadbirda odob-ahloq qoidalari rioya etishlari yuzasidan tavsiyalar berilishini va ana shunday uchrashuvlar ularni fikrlarini erkin bayon etishlari uchun ham tashkil etilishi ta’kidlanadi.
Xulosa o‘rnida, tuman hokimligi va tuman xalq ta’limi bo‘limlari tomonidan ijtimoiy tarmoqlarda keltirilgan topshiriqlarni berilmaganligini ma’lum qilgan holda tumandagi barcha maktab jamoalariga, pedagog-ustozlariga o‘quvchilarini sifatli ta’lim olishlari yo‘lidagi faoliyatlarini samarali olib borishlarini, turli asossiz xabarlar muhokamalariga berilmagan holda faqat ta’lim jarayonlari bilan shug‘ullanishlarini so‘rab qolamiz”, — deyiladi hokimlik munosabatida.
Eslatib o‘tamiz, XTV holatga munosabat bildirib, tizim xodimlarini “Ahmoqona topshiriqlar berishni” to‘xtatishga chaqirgandi. Qonunchilik palatasi deputati Rasul Kusherbayev ham bu holatga munosabat bildirib, “Haliyam feodal zamondamizmi, deb o‘ylab qolasan kishi: hokim xalqning, yoshlarning dardini eshitadigan rahbar emasmi shunda?” — deya savol qoldirgandi.
Izoh (0)