Қодиров вояга етмаган уч ўғли уруш зонасига юборилишини маълум қилди (видео)

Чеченистон раҳбари Рамзан Қодиров вояга етмаган уч ўғлини «махсус операция» зонасига юбормоқчилигини айтди. Унинг таъкидлашича, вояга етмаганлик ҳарбий тайёргарликка халал бермаслиги керак.

Қодировнинг айтишича, ўғиллари Ахмат, Эли ва Адам 16, 15 ва 14 ёшда, бироқ улар ҳарбий тайёргарликни болалигидан бошлаган.

Ахмат, Эли ва Адам махсус ҳарбий операция зонасида ўз маҳоратларини қўллашга тайёр, мен ҳазиллашмаяпман. Ҳақиқий курашда ўзини кўрсатиш вақти келди ва бу уларнинг хоҳиши, мен буни фақат олқишлайман. Тез орада улар фронтнинг олд қаторига боради ва тўқнашув чизиғининг энг оғир участкаларида бўлади, — деди Қодиров Telegram’даги мурожаатида.

Шунингдек, Чеченистон раҳбари тинчликни истаганлар биринчи навбатда урушга тайёрланиши кераклигини айтди.

Мен ҳар қандай отанинг асосий мақсади ўғилларида Аллоҳдан қўрқиш туйғусини уйғотиш, уларга оилани, эл-юртни, ватанни ҳимоя қилишга ўргатиш, деб ҳисоблаганман. Тинчликни хоҳласанг, урушга тайёрлан, — деб ёзган Қодиров.

Чеченистон раҳбарининг сўзларига кўра, Россия махсус кучлари университети қошида ёш йигитлар турли хил қуроллар билан муомала қилиш, улардан исталган масофада фойдаланиш ва назарий асосларни ўрганиши мумкин.

Аввалги мурожаатида Қодиров Чеченистон Украинага «ўқитиб тайёрланган жангчилар» бўлинмасини жўнатганини, яна бир жанговар гуруҳни яқин орада юборишга тайёргарлик кўрилаётганини маълум қилганди.