Германия, Дания, Норвегия ва Франция Киевга артиллерия қуроллари билан ҳарбий ёрдам юборади. Бу ҳақда Le Figaro француз нашрига таяниб, «Интерфакс» хабар берди.
Хусусан, Украина қуролли кучлари тез орада 6 тадан 12 тагача янги француз «Цезарь» ўзиюрар артиллерия мосламалари билан таъминланади.
Нашрнинг ёзишича, қуроллар Франция армияси арсеналидан олинмаган, улар аввалроқ Дания қуролли кучлари учун буюртма қилинган. Эндиликда ушбу қуролларни Украинага етказиб беришга қарор қилинган. Le Figaro Франция аллақачон Украинага 20 га яқин «Цезарь» юборганини эслатди.
Нашр шунингдек, Германия, Дания ва Норвегия 2023 йилда Украинага 16 та ўзиюрар артиллерия мосламаларини етказиб бермоқчилигини ёзди.
2 октябрь куни Тагессчау телеканали Германия мудофаа вазири Кристина Ламбрехтга таяниб, Германия, Дания ва Норвегия Украина учун Словакияда 16 та Zuzana 2 ўзиюрар қуролини ишлаб чиқариш учун маблағ ажратишини маълум қилганди. Немис нашрларининг ёзишича, бу шартнома суммаси 93 миллион еврони ташкил қилади.
Изоҳ (0)