Жаноб Расулнинг жонли ижродаги илк яккахон концерт дастуридан репортаж (фото, видео)

Қорақалпоғистонда хизмат кўрсатган артист Жаноб Расул пойтахтдаги «Халқлар дўстлиги» санъат саройида илк жонли концерт дастурини тақдим этди. Хонанданинг таклифига кўра «Дарё» мухбирлари концертдан фото ва видеорепортаж тайёрлашди. Бу репортаж орқали нафақат саҳнадаги, балки саҳна ортидаги тайёргарлик жараёнлари билан ҳам танишишингиз мумкин.

Хонанда шу куни кучли ҳаяжонда эканлигини яширмади. Чунки у «Дарё»га берган интервьюсида янги дастурга кўнгилдагидек тайёргарлик кўролмаганини яширмаганди.

Концерт олдидаги асосий тайёргарлик жараёнлари ана шундай бўлади. Раққосалар томошабинсиз саҳнада рақс тушишади, хонандалар эса қўшиқ куйлашади.

Концертнинг муваффақиятли ўтиши кўп жиҳатдан овоз кучайтириш ускуналарига ҳам боғлиқ. Аммо концертнинг илк кунидаги техникалардан хонанданинг кўнгли тўлмади. Буни тайёргарлик жараёнида ҳам бир неча бор таъкидлади.

Тайёргарлик жараёнлари ниҳоясига етиб, концерт бошланди. Хонанда дастурни дуэт тарона билан бошлади. У Ҳилола Самиразар билан «Севгиси ёлғоним» номли қўшиқни куйлади.

Жаноб Расул ёш ва ҳали халқ орасида танилиб улгурмаган дуэтдоши билан машҳур турк қўшиғини ҳам ижро этди.

Хонандани кўпчилик шўх ва рақсбоп қўшиқ куйлайди деб ҳисоблайди. Аммо унинг ота-она ва дўст ҳақидаги дардли қўшиқлари ҳам бор. Жонли ижродаги концертда ана шундай қўшиқлардан бир нечтаси янгради.

Концерт давомида техник ускуналарнинг жонли ижрога тайёр эмаслиги кўп бора сезилди. Бу нафақат хонандага балки, тингловчиларга ҳам кўплаб ноқулайликларни туғдирди.

Концертга нафақат Ўзбекистон, балки Қозоғистон ва Тожикистондан ҳам мухлислар ташриф буюришди. Мухлислар қўшни республикалардан ташриф буюришганини айтишганда, хонанда уларга алоҳида миннатдорлик билдирди. У бир нечта қўшиқларини халқ билан бирга ижро этди.

Дастур давомида хонанданинг янги «Королева» номли қўшиғига ишланган клип премьера қилинди. Хонанда премьера сўнгида клип ва дастур режиссёрини халққа таништирди.

Дастур бошловчиси Шукрулло Исроилов доимий анъанасини давом эттириб, бу галги дастурда ҳам бир нечта мухлисларни саҳнага таклиф этди. Улар Жаноб Расулнинг қўшиқларини ижро этишди.

— Концертда дуэт куйламоқчи эдик. Аммо Жаноб Расул жонли ижрода концерт беришини эшитгач, рад этдим, — деди Жаҳонгир Позилжонов.

Шу боис Жаноб Расул «Божалар» гуруҳи рэпертуаридаги «Жийда гули» қўшиғини ўз услубида ижро этди.

Хонанда онасини халққа таништириб, отасининг бугунги концертда йўқлигидан армон қилаётганини айтиб ўтди. У ота-оналарга бағишланган қўшиғини кўз ёшисиз ижро этолмади.

Хонанда концертни Қорақалпоғистон ва Ўзбекистонни мадҳ этувчи қўшиқлари билан якунлади. Дастур кўтаринки руҳда ўтди. Аммо хонанда дастурнинг илк кунидаги овоз кучайтириш ускуналари сабаб ундан кўнгли бироз тўлмаганини  маълум қилди.

Видеони қуйида тўлиқ томоша қилишингиз мумкин.

Мавзуга доир:

• «Тўрт фарзандим бор, аммо уларни оммага кўрсатмайман» — хонанда Жаноб Расул оиласи ва отаси ҳақидаги армонлари ҳақида (видео)
• «Топганимни ҳисобласам, шу пайтгача уймас, аэропорт қуришим керак эди». Жаноб Расул тўйлардан қанча топиши ҳамда 400 минг долларлик уйи ҳақида гапирди (видео)
• « ‘Дада, парҳез қилмасангиз, ўласиз’, дердим». Жаноб Расул отасининг вафотидан олдин кўп койигани, энди эса уни соғинаётгани ҳақида (видео)
• Жаноб Расул YouTube’дан йилига 100 минг АҚШ доллари олиши ҳамда 30 минг доллар сарфлаган клипи ҳақида (видео)