Шавкат Мирзиёев 14 сентябрь куни Самарқанд шаҳрида Шанхай ҳамкорлик ташкилоти доирасида Мўғулистон пезидентини қабул қилди.
Президент матбуот хизматининг хабар беришича, учрашув аввалида давлат раҳбарлари дипломатик муносабатлар ўрнатилганининг 30 йиллиги муносабати билан бир-бирини самимий табриклади.
Ўзбекистон—Мўғулистон муносабатларини фаоллаштириш масалалари кўриб чиқилди. Икки мамлакат президентлари 2022 йил июнида Тошкент шаҳрида ўтказилган биринчи қўшма бизнес-форум якунларини юқори баҳолади.
Савдо-иқтисодий ҳамкорликни янада кенгайтириш учун кенг имкониятлар мавжудлиги таъкидланди. Бунинг учун зарор шартномавий-ҳуқуқий асосларни шакллантириш, қўшма кооперация, энг аввало, агросаноат соҳасида аниқ лойиҳа ва дастурларни илгари суриш масалаларига алоҳида эътибор қаратилди. Маданий-гуманитар алмашинувлар ва ҳудудлараро алоқаларни кенгайтиришдан иккала томон ҳам манфаатдор экани қайд этилди.
Фото: Президент матбуот хизмати
Мўғулистон президенти Ўзбекистоннинг ШҲТдаги самарали раислигини қайд этиб, саммит муваффақиятли ўтишини тилади.
Учрашув якунида икки мамлакат ўртасидаги сиёсий ва иқтисодий алоқаларга тизимли тус бериш, ўзаро манфаатли ҳамкорликни янада кенгайтириш бўйича «йўл харитаси»ни қабул қилишга келишиб олинди.
Мўғулистон пезиденти Ухнаагийн Хурельсух 14 сентябрь куни Самарқанд шаҳрига етиб келганди. Уни Ўзбекистон бош вазири Абдулла Арипов кутиб олди. Сўнг Ҳазрати Хизр мажмуасига келиб, биринчи президент Ислом Каримов қабрига гул қўйди ва хотирасига ҳурмат бажо келтирди.
Ухнаагийн Хурельсух саммит доирасида хорижий давлатлар раҳбарлари билан икки ва кўп томонлама учрашувлар ўтказиши кўзда тутилган.
Эслатиб ўтамиз, Мўғулистон 2004 йилдан бери Шанхай ҳамкорлик ташкилоти ҳузуридаги кузатувчи давлат ҳисобланади.
Изоҳ (0)