Британияда йилнинг биринчи ярмида 71,2 миллион евродан ортиқ озиқ-овқат ишчи кучи етишмаслиги сабабли исроф бўлган. Бу ҳақда Буюк Британия Миллий фермерлар уюшмаси (МФУ) маълум қилди.
Мамлакат бўйлаб оилалар харажатлар ошиб бораётгани сабабли яшаш учун курашаётган бир пайтда сифатли ва тўйимли озиқ-овқатлар исроф бўлаётгани бемаъниликдан бошқа нарса эмас, — деди МФУ президенти ўринбосари Том Бредшоу.
Фермерлар касаба уюшмаси тадқиқотига кўра, январдан июнгача 26 миллион евро (22 миллион фунт стерлинг) миқдоридаги мева-сабзавот 40 фоиз ишчи кучи етишмаслиги оқибатида зарар кўрган.
Brexit фермаларга Европа Иттифоқига аъзо давлатлардан ишчиларни ёллашни қийинлаштириб, ишчи кучи танқислигига сабаб бўлмоқда.
Украиналиклар бу бўшлиқни вақтинча тўлдиришган эди, аммо февраль ойида Россия ва Украина ўртасида уруш бошланганидан кейин кўплаб ишчилар ўз ватанларида қолиб кетди.
Танқисликни бартараф этиш учун Британия Ўзбекистон, Индонезия ва Филиппин, шунингдек, Жанубий Африка каби мамлакатлардан ишчиларни ёллашга мажбур бўлмоқда.
Касаба уюшмасининг таъкидлашича, Британиянинг мавсумий ишчилар схемасини кенгайтириш орқали бу йилги воқеалар такрорланмаслигини таъминлаш мамлакат учун жуда муҳимдир.
Бу йил Британия мавсумий ишчилар учун 38 000 га яқин визага рухсат берди. Бироқ сектор бу кўрсаткичдан деярли икки баробар кўпроқ визага муҳтожлигини маълум қилган — 70 000 дан зиёд.
Июнь ойида Британияда бўш иш ўринлари рекорд даражага етган эди. Бу эса Ўзбекистон учун қулай имконият бўлиши кутилган эди.
Марказий Осиёдаги кўплаб камбағал оилалар учун Россия—Украина урушининг узоқ давом этиши молиявий ҳалокатга олиб келиши мумкин.
Жаҳон банки ҳисоботига кўра, Россияда Марказий Осиёдан келган 8 миллионга яқин муҳожир бўлиб, мамлакат асосий манзил сифатида ўз жилосини йўқота бошлагач, улар бошқа муқобил вариант қидирмоқда.
Буюк Британиядаги фермер хўжаликлари маҳсулот танлаб олиш ва Brexit билан боғлиқ ишчи кучи танқислигини тўлдириш учун Ўзбекистондан ишчиларни қабул қилишни июнь ойида бошлаган эди.
Изоҳ (0)