Европада электр энергияси нархи кескин ошди

Европада электр энергиясини етказиб бериш бўйича келаси йил учун шартномалар нархи янги, юқори даражага етди. Бу ҳақда Bloomberg хабар бермоқда.

Европа энергия биржасидаги савдолар натижасида Германияда фьючерс шартномаси 3,2 фоизга ошиб, 1 МВт/соат учун 475 еврони (487 доллар) ташкил этди.

Бу ўтган йилга нисбатан деярли олти баравар юқори. Буюк Британияда электр энергиясини етказиб бериш бўйича шартнома нархи етти марта ошди — 1 МВт/соат учун 591 фунт стерлингга (713 доллар) етди.

Агентликнинг қайд этишича, Европада электр энергиясига талабнинг юқорилиги минтақада ҳаво ҳароратининг ошиши билан боғлиқ.

Ғайритабиий иссиқлик европаликларни электр тармоғидан қувватланадиган термал назорат қурилмаларидан фойдаланишга мажбур қилмоқда.

Rystad Energy таҳлилчиси Фабиан Роннингеннинг фикрича, қитъада ядро, гидроэлектр ва кўмир қувватларининг паст даражаси туфайли электр энергияси нархининг ошиши тез орада тўхтамайди.

Европа ҳукуматлари электр энергияси нархларини тартибга солиш бўйича қўшимча чора-тадбирларни кўриб чиқмоқда.

Франция ҳукумати дунёдаги энг йирик АЭС оператори Electricite de France’ни бутунлай миллийлаштиришни режалаштирмоқда.

Аввалроқ Европада газ нархи март ойидан бери биринчи марта 2 400 доллардан ошган эди.