Ўзбекистоннинг 2026 йилда топ-50 инновацион давлатлар қаторидан жой эгаллаши асосий мақсад этиб белгиланган

Ўзбекистон 2026 йилда топ-50 инновацион давлатлар қаторидан жой эгаллаши асосий мақсад этиб белгиланган. Бу ҳақда АОКАда инновацион ривожланиш вазири ва мутасаддилари иштирокида ўтказилган матбуот анжуманида маълумот берилди.

Таъкидланишича, инновацион технологик парк, технологиялар трансфери маркази, инновацион кластер, венчур ташкилоти, инновация маркази, стартап акселератор, инкубаторлар каби инновацион инфратузилма субъектлари тармоғини шакллантириш орқали стартап ташаббусларни қўллаб-қувватлаш ҳамда йирик ҳажмли ишлаб чиқаришни ташкил этиш Ўзбекистон Республикасининг 2022—2026 йилларда инновацион ривожланиш стратегиясининг асосий йўналишлари этиб белгиланган.

Қарорга кўра, ҳудудларда 224 та, тармоқларда 441 та, олийгоҳлар ва илмий ташкилотларда 1 минг 86 та лойиҳани амалга ошириш белгиланган.

Ҳозирда тармоқ ва олийгоҳ/илмий ташкилотлар кесимида жами 1751 та инновацион лойиҳа шакллантирилган. Хусусан, ҳудудлар кесимида 2507 та иш ўрни яратиладиган 206 миллиард сўмлик 224 та лойиҳа амалга оширилмоқда.

Тармоқлар кесимида эса илмий-инновацион маҳсулотлар ишлаб чиқарилиши белгиланган 26 та тармоқ ташкилотнинг 6,6 триллион сўмлик 265 та лойиҳа; иқтисодиёт тармоқларида амалга ошириладиган 33 триллион сўмлик 176 турдаги инновацион маҳсулотларни сериялаб ишлаб чиқариш ва технологиялар ўзлаштирилиши назарда тутилган «драйвер» лойиҳалар шакллантирилган.