Buyuk Britaniyada 19-iyul kuni tarixiy maksimal harorat qayd etildi. Linkolnshir grafligidagi Koningsbi shahrida havo Selsiy bo‘yicha 40,3 darajagacha qizigan.
Britaniyada bundan avvalgi rekord — 38,7 daraja issiq 2019-yil iyul oyida Kembrijda qayd etilgan edi. 2022-yilning 19-iyulida birdaniga 34 ta aholi punktida harorat rekord o‘natdi, deya xabar bermoqda Britaniya ob-havo xizmati.
Jazirama tufayli London atrofida yong‘inlar kelib chiqdi. Xususan, Dartford yalangligida yong‘inlar qayd etilgan. Cho‘l yaqinidagi Dartford Londondan 20 kilometr uzoqlikda joylashgan.
BBC News Xertfordshir, Bedfordshir hududlari, shuningdek, Londonning o‘zida – Vennington va Kroydonda yong‘inlar yuzaga kelgani haqida ham xabar bermoqda. Britaniya poytaxti aholisi uylaridan evakuatsiya qilinmoqda, yuzlab o‘t o‘chiruvchilar joylarda ishlamoqda, deyiladi xabarda. Yong‘in oqibatida ikki kishi kasalxonaga yotqizilgan.
Sky News xabar berishicha, London meri Sodiq Xon shahardagi vaziyatni og‘ir deb atadi. U aholini yaqin kunlarda shahar parklari va xususiy bog‘larida, shuningdek, hovli va balkonlarda barbekyu qilmaslikka chaqirdi. London o‘t o‘chirish bo‘limi odatda kuniga 300-350 ta qo‘ng‘iroqni qabul qilardi, 19-iyul kuni bu raqam 1600 tadan oshib ketdi, deydi shahar meri.
20-iyul, chorshanba kuni meteorologlarning prognozlariga ko‘ra, rekord darajadagi issiqlik to‘lqini pasayadi, biroq Buyuk Britaniyaning ko‘plab hududlarida havo harorati yilning shu kunidagi o‘rtacha ko‘rsatkichdan hamon yuqori bo‘ladi.
Izoh (0)