«Ортиқча ваҳимага берилмасликни сўраймиз». Масъуллар Тўпаланг сув омборидаги ҳолат юзасидан воқеа жойида маълумот берди

Ижтимоий тармоқларда Сурхондарё вилояти Сариосиё туманида жойлашган Тўпаланг сув омбори тўғони ёрилиб кетгани ва натижада атрофни сув босгани ҳақидаги хабарлар тарқалганди. «Ўзбекгидроэнерго» АЖ мазкур ҳолатга расмий муносабат билдирди.

Маълум қилинишича, Тўпаланг сув омборида 378 миллион метр куб сув ҳажми мавжуд бўлиб, сув омборининг сув чиқариш иншооти орқали дарёга 120 метр куб/сония миқдорида сув чиқарилаётган эди.

Модернизация лойиҳаси доирасида синов ишлари олиб борилаётган босимли сув қувури тўсини шикастланиб, қўшимча 40 метр куб/сония атрофида сув миқдори ГЭС биноси орқали чиққан. Натижада умумий сув сарфи 160 метр куб/сонияга кўтарилган ҳамда Тўпаланг дарёсига йўналтирилган.

«Эътиборга молик жиҳати, ушбу ҳолатда Тўпаланг сув омбори тўғони билан боғлиқ бирор-бир муаммо кузатилмаган», — дейилади муносабатда.

Таъкидланишича, 160 метр куб/сония сув сарфи миқдори Тўпаланг дарёси ўзани учун мутлақо хавфсиз ҳисобланиб (дарёнинг сув ўтказиш қобилияти 600 метр куб/сония), пастки қисмда яшовчи аҳоли хонадонлари ва корхоналар учун ҳеч қандай салбий оқибатларни келтириб чиқармайди.

Ушбу воқеа натижасида шикастланганлар ва жабр кўрганлар мавжуд эмас. Вазият тўлиқ назорат остида.

«Юртдошларимиздан, айниқса, Сариосиё тумани аҳолисидан мутахассислар томонидан билдирилган асосли фикр-мулоҳазаларга тўлиқ ишонч билдиришни ҳамда ортиқча ваҳимага берилмасликни сўраймиз», — дея қайд этилади хабарда.

Аввалроқ Фавқулодда вазиятлар вазирлиги сув омборининг мустаҳкамлигига зиён етмагани, айни вақтда чиқарилаётган сув ҳажмини камайтириш ишлари олиб борилаётганини маълум қилганди.

Маълумот учун, Тўпаланг сув омбори 1982 йилда қурила бошланган бўлиб, лойиҳа қуввати 500 миллион куб метр. Сув омбори тўғонининг баландлиги 165 метр, яна 22 метр ер остига пойдевор қилинган, умумий 187 метрни ташкил қилади.

Бундан олдин Намангандаги сув омбори тўғони остидан сув сизиб чиққани аниқланганди.