Қашқадарё вилоятининг Ғузор туманида ҳоким ёрдамчиси 300 доллар пора билан қўлга тушди. Айтилишича, у Қарши туманида яшовчи фуқарони Республика шошилинч тиббий ёрдам илмий маркази Қашқадарё филиалига фелдшер лавозимига ишга киритиб қўйишни ваъда қилиб, эвазига ундан 300 доллар пул олган.
«Дарё» сўровига жавобан Ғузор тумани ҳокимлиги мазкур вазиятга изоҳ берди.«Фуқаро Э.Ф. муқаддам вилоят Бандлик бошқармасида бўлим бошлиғи лавозимида фаолият кўрсатган бўлиб, 2022 йил 12 январдан бошлаб ‘Жонбулоқ’ маҳалласида ҳоким ёрдамчиси лавозимида иш юритиб келмоқда. Унинг ҳоким ёрдамчиси лавозимига ишга қабул қилинишида фаолият кўрсатиб келган иш жойидан ижобий тавсифланганлиги ҳам эътиборга олинган. 2022 йилнинг ўтган даври мобайнида ҳоким ёрдамчилари томонидан янги иш ўринларини яратиш, аҳоли бандлигини таъминлаш ва халқни рози қилиш йўлида бир қатор ижобий ишлар амалга оширилди. Шунингдек, коррупция ҳолатларининг олдини олиш мақсадида ҳоким ёрдамчилари фаолияти туман ҳокимлиги, сектор раҳбарлари ҳамда маҳаллабай ишлаш ва тадбиркорликни ривожлантириш туман маркази томонидан доимий назорат қилиб борилди. Бу борада учрашув ва тарғибот ишлари ўтказилган. Учрашувлар давомида ҳоким ёрдамчиларидан кафолат хатлари олиниб, жараёнлар тегишли тартибда расмийлаштирилган.
Шунга қарамасдан, жорий йил 12 май куни ҳоким ёрдамчиси Э.Ф. ўз ваколатига кирмайдиган иш — Қарши туманида яшовчи фуқарони Республика шошилинч тиббий ёрдам илмий маркази Қашқадарё филиалига фелдшер лавозимига ишга киритиб қўйишни ваъда қилиб, эвазига фирибгарлик йўли билан 300 долларни олган вақтда жиноят устида қўлга олинган», — дейди ҳокимлик масъуллари пора ҳақидаги маълумотни тасдиқлар экан.
Ҳокимлик, шунингдек, пора билан қўлга тушган ҳоким ёрдамчиси аввалги ишидаги имкониятини ҳисобга олиб пора олганини, айни пайтдаги лавозими бундай ваколат бермаслигини айтмоқда.
«Ҳокимлик Э.Ф. томонидан содир этилган фирибгарлик жиноятини оқлаб бўлмаслигини таъкидлаб, унинг мазкур жиноий ҳаракати ҳоким ёрдамчиси фаолиятига дахли йўқлигини маълум қилади», — дейилади ҳокимликнинг расмий муносабатида.
Қашқадарё вилоят прокуратураси ҳолат юзасидан тергов-суриштирув жараёнлари олиб борилаётганини маълум қилди.
Изоҳ (0)