Тошкентнинг Юнусобод туманидаги икки оилавий поликлиникага фойдаланишга яроқсиз лифтлар ўрнатиб кетилгани аниқланди.
Бош прокуратура ҳузуридаги департаментнинг Юнусобод туман бўлими томонидан ўтказилган терговга қадар текширувда аниқланишича, «Л.К.» МЧЖ раҳбари Ж.Х. ва бошқалар «Д.Т.» хусусий корхонаси билан тузилган шартномага асосан тумандаги 56 ва 64-сонли оилавий поликлиникаларга фойдаланишга яроқсиз бўлган 2 дона эски лифтни техник тайёрлиги ҳақидаги ҳужжатларни сохталаштириш орқали ўрнатиб бериб, 340 миллион сўмни ўзлаштириш йўли билан талон-торож қилган.
Саноат хавфсизлиги давлат қўмитасининг хулосасига кўра, ушбу лифтлар 1990 йилда ишлаб чиқарилган бўлиб, техник жиҳатдан фойдаланиш учун яроқсиз эканлиги маълум бўлган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Изоҳ (0)