Бугун,

  • USD 10940.05
  • RUB 182.26
  • EUR 11121.65

Эстония, Бельгия ва Болгария ўзининг денгиз ва дарё портларини Россия кемалари учун ёпди, деб хабар беради Tengrinews.

Фото: Elements.envato

Фото: Elements.envato

Эстония ҳукумати 17 апрелдан бошлаб Россия кемаларининг, шунингдек, 24 февралдан кейин Россия байроғини бошқасига алмаштирган барча кемалар учун ўз портларига киришни тақиқлаганини маълум қилди. Мамлакат иқтисодиёт ва инфратузилма вазирининг таъкидлашича, тақиқ Европа Иттифоқи санкциялари доирасида жорий этилган.

Вазирликнинг аниқлик киритишича, Эстония портлари фақатгина фалокатга учраган Россия кемаларини истисно тариқасида киритиши мумкин, бироқ шунда ҳам полиция департаменти ва чегара хизматининг махсус рухсати талаб этилади.

Болгария ҳукумати ҳам шу каби қарорни қабул қилганини эълон қилди. Республика Денгиз маъмурияти маълумотларига кўра, Болгария денгиз ва дарё портларига Россия байроғи остида рўйхатдан ўтган барча кемаларнинг кириш тақиқланади. Болгария қарори ҳам худди Эстония ҳукуматиники каби Евроиттифоқ санкцияларига боғлиқ.

Шу билан бирга, Бельгияда ҳам Россия байроғи остидаги кемаларнинг ўз портларига киришини тақиқловчи қарор кучга кирган. Санкцияларни қўллаш бўйича Европа қоидаларига кўра, ЕИ портларида маълум бир кемалар махсус рухсатнома орқали кириши мумкин ва бунда аниқ бирор порт масъулиятни ўз зиммасига олади.

«Улар қаторида харидлар, импорт ёки Европа Иттифоқига газ ва нефтни ташиш, шунингдек, фармацевтика, тиббиёт, қишлоқ хўжалиги, озиқ-овқат маҳсулотлари, жумладан, буғдой ва ўғитлар бор», — дейилади хабарда.

Бундан олдин Байден Россия нефти ва газини импорт қилишни тақиқловчи қонунни имзолагани, Европа Иттифоқи Россияга қарши янги санкциялар пакети устида ишлаётгани тўғрисида хабар берилганди.

Изоҳ
Асосий янгиликлар