Самарқандда номаълум эркак 7 ёшли қизга уятсиз ҳаракатлар қилгани айтилган хабарлар бўйича расмий маълумот берилди

Ижтимоий тармоқларда Самарқанд шаҳрида номаълум эркак 7 ёшли қизни тақиб қилиб, уятсиз ҳаракатлар қилгани, отаси келиб қолгач, қочиб кетгани айтилган хабарлар тарқалди. Бош прокуратура матбуот котиби Ҳаёт Шамсутдинов ҳолат бўйича «Дарё»га маълумот берди.

Қайд этилишича, 28 март куни Самарқанд шаҳри Б.Йўли кўчасида яшовчи Ғ.Б. (1985 йил туғилган) ички ишлар бўлимига ариза билан мурожаат қилган. Унда айтилишича, 27 март куни соат тахминан 16:30 ларда вояга етмаган қизи Й.З. (2015 йилда туғилган) уйидан пастга тушаётган вақтида кириш йўлаги эшиги ёнида номаълум шахс унга шимини ечган ҳолда уятсиз ҳаракатлар қилиб турганини кўрган. Фуқаро ушбу номаълум шахсга нисбатан қонуний чора кўришни сўраган.

Гумонланувчи: ёши тахминан 40-45 ёшларда, рус миллатига мансуб, бўйи тахминан 165-170 см, эгнида қора рангли ўнг қўлида оқ ёзувли спорт кийими, юзида тиббий ниқоб бўлган.

Ҳолат юзасидан гумонланувчининг шахсини аниқлаш борасида тезкор-суриштирув ҳаракатлари ўтказилмоқда.