ДХХ томонидан ташкиллаштирилган тезкор тадбирда Ўзбекистон фуқароларига сохта паспорт тайёрлаб бериб, уларни Умра зиёратига жўнатиш билан шуғулланиб келган шахслар қўлга олинди.
Маълум бўлишича, Тожикистон ва Қирғизистон фуқаролари билан тил бириктирган бир гуруҳ шахслар, Умра зиёратига бормоқчи бўлган ўзбекистонликларни Қозоғистоннинг сохта фуқаролик паспортларини тайёрлаш орқали 2,2 минг доллар эвазига мунтазам равишда зиёратга жўнатиш билан шуғулланиб келган.
Улар бу ишни Саудия Арабистони томонидан қозоғистонликлар учун соддалаштирилган кириш режими — электрон виза жорий қилинганидан фойдаланиб, амалга оширган.
Тошкент халқаро аэропортида 40 нафар ўзбекистонликни Умра зиёратига сохта паспорт тайёрлаб, олиб кетаётганлар қўлга олинган. Шунингдек, зиёратга кетаётган 40 нафар ўзбекистонликнинг 10 йилга хориж мамлакатига киришига тақиқ қўйилган.
«Уч кундан бери Дубайдамиз. Гуруҳимиз 30 кишидан иборат эди. Аэропортга келганимизда қўлимиздаги ҳужжатлар қалбаки экани аниқланди. Шу бўйи Мадинага учиб кетганимиз йўқ», — дейди алданганлардан бири.
Ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Аввалроқ Ўзбекистонда Умра зиёрати қачондан бошланиши ва унинг нархлари ҳақида маълумот берилганди. Унда 2020 йил февраль ойига қадар Умра зиёрати учун охирги белгиланган тўловларни амалга оширганлар қўшимча равишда 4 770 000 сўм маблағ тўлаши ҳам келтириб ўтилган эди. Ижтимоий тармоқларда ушбу қўшимча тўлов борасида турли мулоҳазалар билдирилганидан сўнг, Мусулмонлар идораси ҳолатга изоҳ бериб, коронавирус пандемияси Умра хизматлари кўрсатишга ҳам салбий таъсир кўрсатганини маълум қилди. Қайд этилишича, меҳмонхонада 4 кишилик хонага 2 нафар зиёратчи, 50 ўриндиқли автобусга 25 киши жойлаштириш каби талаблар ўрнатилган. 22 январь куни эрта тонгда Умра—2022 мавсумининг илк зиёратчилари Тошкент халқаро аэропортидан Саудия Арабистонига жўнаб кетганди.
Мавзуга доир:
Изоҳ (0)