Беларусь мухолифати етакчиси Светлана Тихановская 2022 йилги тинчлик бўйича Нобель мукофотига номзод сифатида кўрсатилди. Бу ҳақда унинг вакили Франак Вячорак ўзининг Twitter’даги саҳифаси орқали маълум қилди.
Фото: AP Photo
«Норвегия парламентарийлари Вервик Булестад ва Харек Элведен Светлана Тихановскаяни Беларусь фуқароларининг ўз озодлиги учун давом этаётган курашлари рамзи сифатида тинчлик бўйича Нобель мукофотига номзод сифатида кўрсатди», — дейилади хабарда.
Булестад маҳаллий Христиан-демократик партия етакчиси, Элвенсен эса Норвегия Консерватив партияси вакили ҳисобланади.
Таъкидлаш керакки, Тихановская 2021 йилда ҳам Нобель мукофотига номзод сифатида кўрсатилган эди, бироқ рейтинги юқори бўлганига қарамай, унга лойиқ кўрилмаганди. Шунингдек, ўтган йили Чеченистон раҳбари Рамзан Қодиров ҳам тинчлик бўйича Нобель мукофотига номзод сифатида кўрсатилганди.
Эслатиб ўтамиз, 8 октябрь куни тинчлик бўйича Нобель мукофотига Россиянинг «Новая газета» нашри бош муҳаррири Дмитрий Муратов ва филиппинлик журналист, Rapple мухолифатчи сайти раҳбари Мария Ресса сазовор бўлди. Нобель мукофоти уларга «демократия ҳамда барқарор тинчлик ўрнатилишининг дастлабки шарти бўлган фикр билдириш эркинлигини ҳимоя қилиш бўйича интилишлари» учун берилган.
