Вашингтон Қирғизистон—Тожикистон чегарасида сўнгги кунларда содир бўлган воқеалардан хавотирда. Бу ҳақда АҚШ Давлат департаменти вакили Нед Прайс Twitter’даги саҳифасига ёзиб қолдирган.
«АҚШ Қирғизистон—Тожикистон чегарасида яна юзага келган зўравонликдан чуқур хавотирда. Қурбонлар, уларнинг оилалари ва зўравонлик туфайли уйларини тарк этишга мажбур бўлганларни ўйлаяпмиз», — деб ёзади у.
«Биз чегара масалаларини музокаралар йўли билан ҳал қилишга ва тинч-тотув яшашга чақирамиз», — дея қўшимча қилади Прайс.
Қирғизистон Миллий хавфсизлик қўмитаси Чегара хизматининг маълум қилишича, 29 январь ҳолатига кўра Қирғизистон—Тожикистон давлат чегараларидаги вазият барқарор дея баҳоланмоқда.
Эслатиб ўтамиз, 27 январь куни Қирғизистон чегара хизмати Қирғизистон—Тожикистон чегарасида Боткен—Исфана йўлининг тўсиб қўйилиши ортидан зиддият юзага келгани ҳақида хабар берди. Қирғизистон ва Тожикистон чегара вакиллари ўртасидаги музокаралардан сўнг йўлнинг бир қисми очилди. Аммо кейин Қирғизистон ва Тожикистон чегара қўшинлари бўлинмалари ўртасида тўқнашув бошланди. Қирғизистон Соғлиқни сақлаш вазирлиги маълумотларига кўра, отишмада етти киши жароҳатланган. Республиканинг Фавқулодда вазиятлар вазирлиги хабар беришича, Тожикистон билан чегарадош ҳудуддан деярли 1,5 минг киши эвакуация қилинган.
Изоҳ (0)