Шавкат Мирзиёев 2022 йилда 21 та қишлоқ туманида 10 минг оила учун «Янги Ўзбекистон» массивлари, мактаб, боғча ва тиббиёт масканлари қурилишини маълум қилди

14 декабрь куни Президент Шавкат Мирзиёев бошчилигида ўтказилаётган хизматлар соҳасида амалга оширилаётган ишлар ва келгуси йил режалар масалаларига бағишланган видеоселектор йиғилишида 2022 йилда 21 та қишлоқ туманида 10 минг оила учун «Янги Ўзбекистон» массивлари, мактаб, боғча ва тиббиёт масканлари қурилиши қайд этилди. Бу ҳақда «Дарё» мухбири хабар қилди.

Вилоят ҳокимлари тижорат банклари билан бирга, келгуси йилдан ҳар бир массивда 21 турдаги зарур хизмат кўрсатиш лойиҳаларини амалга оширишни бошлаши бўйича топшириқ берилди.

«Чегара олдида жойлашган 25 та ҳамда ҳудудидан халқаро автомагистрал ва темир йўллари ўтган 100 та туман савдо ва логистика хизматлари кўрсатишга ихтисослашади. Мисол учун, Ғиждувон туманидан ўтган А-380 халқаро автомагистрал йўли ёқасида 245 та аҳоли уй-жойлари жойлашган.

Ушбу уйларнинг биринчи қаватида хизмат кўрсатишни йўлга қўйиш шарти билан кўп қаватли этиб қайта қуриш учун имтиёзли кредит ажратиш ҳисобига, камида 1 мингта иш ўрни яратиш мумкин», – дейди президент.

Масъул ташкилотларга 2 ой муддатда халқаро йўллар бўйидаги хонадонларни хатловдан ўтказиб, уларда хизмат кўрсатишни ташкил этиш бўйича аниқ лойиҳаларни шакллантириш вазифаси берилди.

Бугунги кунда магистрал йўл бўйи сервис объектлари бўйича 835 гектар ер участкалари рўйхати шакллантирилиб, 630 гектари аукционга чиқарилган ва шундан атиги 308 гектари сотилган. Шундан Қашқадарёда 227 гектар майдон савдога чиқарилган ва тўлиқ сотилган.

«Мисол учун, Наманганда атиги 3 гектар, Сирдарёда – 6 гектар, Тошкент вилоятида – 10 гектар, Қорақалпоғистонда – 12 гектар ер участкаси савдога чиқарилган», – дейди давлат раҳбари.

Масъул ташкилотларга уч ой муддатда барча халқаро автомобиль йўллари атрофида хорижий лойиҳачиларни жалб этган ҳолда йўл бўйи хизматларини ривожлантириш дастурини ишлаб чиқиши белгиланди.