Rossiya prezidenti Vladimir Putin o‘zining o‘rnini egallashi mumkin bo‘lgan voris haqida gapirib, prezidentlikka munosib nomzod haqida gapira oladigan vaqt hali kelishini bildirdi. Bu haqda u “RBK”da translyatsiya qilingan jonli efir davomida aytib o‘tgan.

Foto: “Kremlin.ru”

“Prezidentlikka nomzodini qo‘yadigan kishilarga tavsiyalar berish mening zimmamdagi mas’uliyat. Dunyoning barcha mamlakatlarida shunday. Bu borada birorta istisnoni bilmayman. Albatta, vaqti keladi va umid qilamanki, falonchi odam mening fikrimcha, Rossiyadek ajoyib mamlakatni boshqarishga loyiq, deya olaman”, — dedi Putin.

Rossiya prezidenti muqaddas joy hech qachon bo‘sh qolmasligini va o‘rnini bosadigan odamlar topilishini ta’kidladi.

Sobiq prezident Boris Yelsinning misolidan kelib chiqib, hozir ham Putin ixtiyoriy ravishda hokimiyatni kimgadir o‘tkazishi mumkinmi, degan mavzuda so‘z ketgan vaqtda Putin hokimiyatni unga Yelsin o‘tkazmagani, u mamlakatni tegishli qonun asosida boshqarganini ta’kidladi.

“Gap shundaki, bizning asosiy qonunimizga binoan, agar prezident o‘z vakolatlarini tark etsa, Rossiya Federatsiyasi hukumati raisi amaldagi prezidentga aylanadi. Men o‘sha vaqtda hukumat raisi edim”, — deya tushuntirdi Putin.

1999-yilda Yelsin uni hukumatni boshqarishga taklif qilgan suhbatni eslab, Putin dastlab buni rad etganini aytdi. Putinning so‘zlariga ko‘ra, Yelsin juda ajablangan va ​​buning sababini so‘ragan. ‘Men unga Boris Nikolayevich, men tayyor emasman’ degandim. Vaholanki, kap-katta odam edim”, — dedi Rossiya prezidenti.

Putin har qanday kasb egasi mamlakatni boshqarishi mumkinligini ta’kidladi, ammo huquqiy bilim va qonunlarni bilish davlat rahbari bo‘lishga yordam beradi. Uning so‘zlariga ko‘ra, eng asosiysi, prezident bo‘lishga qaror qilgan inson hayotining muhim qismini butunlay o‘z ishiga bag‘ishlashga tayyor bo‘lishi kerak.

So‘ng Putin 2000-yildan beri voris tanlash haqida o‘ylayotganini, ammo yakuniy qarorni fuqarolar qabul qilishini aytdi. “Bo‘lajak rahbar nima ishda, qanday faoliyat yuritayotgani muhim emas, u kimning qanday vakili bo‘lishi ahamiyatsiz, hal qiluvchi ovozni saylovchi beradi”, — deya ta’kidladi u.

1999-yil avgustda, Putin Federal xavfsizlik xizmati direktori va Rossiya Xavfsizlik kengashi kotibi bo‘lib ishlayotganida, Yelsin uni hukumat boshlig‘i lavozimiga nomzod qilib ko‘rsatgan va keyinroq televizion murojaatida uni o‘z vorisi deb atagan.

1999-yil 31-dekabrda Yelsin iste’foga chiqqach, Putin prezident vazifasini bajaruvchi bo‘ldi. 2000-yil 26-martda u prezidentlik saylovlarining birinchi bosqichida g‘alaba qozondi va 2000-yil 7-maydan rasmiy ravishda davlat rahbari bo‘lib ish boshladi.

Eslatib o‘tamiz, 5-aprel kuni Vladimir Putin o‘ziga yana davlat rahbarligi lavozimini egallash uchun saylovlarda ishtirok etish imkonini beruvchi qonunni imzoladi.