Украина Россия босқинига учраган тақдирда АҚШ у ерга ўз ҳарбийларини юборишни режалаштирмаяпти. Бу ҳақда Америка етакчиси Жо Байден 11 декабрь бўлиб ўтган брифингда айтиб ўтди.
Брифингда Вашингтон нега армиянинг бир қисмини Украинага жойлаштиришдан бош тортгани ҳақида журналист саволига Оқ уй раҳбари: «Бундай имконият ҳеч қачон кўриб чиқилмаган», деб жавоб берди.
Шу билан бирга, Байденнинг аниқлик киритишича, у Россия президенти Владимир Путин билан бўлиб ўтган онлайн саммит чоғида Кремль раҳбарини вазият кескинлашган тақдирда Америка қўшинлари НАТОнинг шарқий қанотида жойлашган Бухарест тўққизлиги (B9 — Болгария, Венгрия, Латвия, Литва, Польша, Руминия, Словакия, Чехия ва Эстония) мамлакатларига юбориши ҳақида огоҳлантирган.
«Биз шарқий қанотга Америка ва НАТО қўшинларини янада кўпроқ юборишимиз керак бўлади, Б9 — ушбу НАТО мамлакатларининг барчасини Россиянинг ҳар қандай ҳужумидан ҳимоя қилиш бўйича муқаддас мажбуриятимиз бор», — деди Америка раҳбари.
АҚШ президентининг сўзларига кўра, «Путин эҳтимолий оқибатларнинг жиддийлигини тушунган».
Аввалроқ NBC телеканалининг манбаларига таяниб хабар беришича, Жо Байден маъмурияти Украинага 200 миллион долларлик ҳарбий ёрдам пакетини тайёрлаган эди, бироқ уни жўнатишни кейинга қолдирди.
Телеканал маълумотларига кўра, ҳужжат уч-тўрт ҳафта олдин тайёр бўлган. Бу ҳақда ўтган ҳафта эълон қилиниши кутилаётганди. Аммо АҚШ Россия ва Украина ўртасидаги зиддиятнинг дипломатик усуллар билан юмшатилишига кўпроқ вақт бериш, шунингдек, Россия босқини юз берган тақдирда вазиятга таъсирини сақлаб қолишга қарор қилгани сабабли ёрдам кечиктирилган.
Шу билан бирга, NBC’нинг қайд этишича, зиддият кучайган тақдирда АҚШ ҳарбий ёрдамни сезиларли даражада ошириш вариантини кўриб чиқмоқда.
Тасдиқланган 200 миллион долларлик пакет айнан нималардан иборат экани очиқланмаган. Аввалроқ Украина АҚШдан иложи борича тезроқ ҳаво мудофаа тизимлари, кемага қарши ва танкга қарши ракеталар, радар тизимлари, артиллерия ўқ-дорилари ва дори-дармонлар юборишни сўраган эди. NBC таъкидлашича, АҚШнинг ёрдамни кечиктириш тўғрисидаги қарори Киевнинг хафсаласини пир қилган.
Украина атрофидаги вазият 7 декабрь куни Россия ва АҚШ президентлари Владимир Путин ва Жо Байден ўртасидаги онлайн музокараларда муҳокама қилинган эди. Байден Путинни Россия Украинага бостириб кирган тақдирда «кескин иқтисодий ва бошқа чоралар» ҳақида огоҳлантирган. Путин, ўз навбатида, НАТОни «Украина ҳудудини босиб олишга бўлган хавфли уринишлар»да айблаган ва альянснинг шарққа томон кенгайиши тўхтатилишига кафолат талаб қилган.
АҚШ Россиянинг Украинага ҳужуми юз берадиган бўлса, Москвага қарши санкциялар қўллашини, бу эса мамлакатнинг жаҳон молиявий тизимидан «тўлиқ яккаланиб қолишига» сабаб бўлишини билдирди. АҚШ ОАВларининг хабар беришича, пакет Россияни SWIFT банклараро ўтказма тизимидан узиб қўйиш ва рублни бошқа валюталарга конвертация қилиш бўйича чекловларни ўз ичига олади.
Мавзуга доир: