Ўзбекистонда 7 декабрнинг энг асосий ҳодисаси — Деновдаги портлаш. «Indenim» (собиқ «Юбилейний») савдо мажмуасида юз берган жуда кучли портлаш оқибатида камида 9 киши тан жароҳати олиб, шифохонага ётқизилган, савдо мажмуаси вайроналари остидан эса ҳозиргача икки кишининг жасади топилган. Бундан ташқари, мажмуа яқинидаги бошқа маъмурий ва турар жой биноларига жиддий шикаст етган. Шу қадар катта ҳодисаки, ҳали кун ёришмай бош вазир ўринбосари Очилбой Раматов бошчилигидаги ҳукумат комиссияси тузилиб, Сурхондарёга сафарбар қилинган.
Мавзуга доир: «Қонга беланган бир аёл ва эркак бақириб ёрдам сўрарди». Деновдаги даҳшатли портлаш жойидан репортаж
Умуммиллий байрам — Конституция куни арафасида юз берган машъум воқеани Ўзбекистоннинг марказий телеканалларидаги информацион дастурлар қандай ёритди? «Дарё» уларнинг барини кузатиб чиқди.
«Миллий» телеканали, «Миллар» информацион дастури
Кадр: «Миллий» телеканали
Деновдаги портлаш ҳақида «Миллий» телеканалининг «Миллар» информацион дастурида соат 16:30 да ахборот берилди. Бир дақиқадан кўпроқ давом этган лавҳа Фавқулодда вазиятлар вазирлиги (ФВВ) матбуот хизмати томонидан кун давомида берилган ахборотларни такрорлайди, холос (унда ҳатто портлаш ҳам «фе-ве-веча»сига «чақнаш» дейилган).
«Ёшлар» телеканали, «Янги Давр» информацион дастури
Кадр: «Ёшлар» телеканали
«Янги Давр»нинг 19:00 даги сонида Деновдаги ҳодиса куннинг энг муҳим иккинчи ҳодисаси сифатида тақдим этилди. Салкам 90 сониялик лавҳа ФВВ эълон қилган ахборотларнинг такрори бўлди, дейиш мумкин. Фарқли жиҳати, ФВВ ахборотларининг ярмини «Давр» бошловчилари ўқиб берган, қолган ярмини «Давр» студияси билан «телефон орқали боғланган» ФВВ матбуот котиби Мурод Содиқов ўқиб эшиттирди.
«Менинг Юртим» телеканали, «Марказий студия» информацион дастури
Кадр: «Менинг юртим» телеканали
«Марказий студия»нинг соат 19:00 даги эфирида Деновдаги ҳодиса тўртинчи хабар сифатида берилди ва бошловчилар кун давомида ФВВ берган ахборотга айтарли қўшимча қила олмади. Улар «шу манзилда бўлиб турган манбалар»га таяниб «қидирув-қутқарув ишлари давом этаётгани»ни таъкидлаб, воқеанинг батафсил тафсилотлари билан «Марказий студия»нинг эртанги (8 декабрдаги) сонида танишиш мумкинлигини эслатиб ўтди.
«Зўр-ТВ» телеканали, «Бу кун» информацион дастури
Кадр: «Зўр-ТВ» телеканали
«Бу куни» соат 20:00 даги ҳисобот эфирида Деновдаги портлашни куннинг энг асосий ҳодисаси сифатида биринчи хабар қилиб берди, аммо бу 85 сониялик лавҳа ФВВнинг кун давомида берган қисқа ахборотлари жамланмаси бўлди, холос.
«Севимли» телеканали, «Замон» информацион дастури
«Замон»нинг 12:00 даги эфирида Деновдаги портлаш биринчи хабар сифатида берилди ва у 65 сониялик лавҳа, табиийки, ФВВ ахборотининг такрори эди. 20:00 даги ҳисобот эфирида портлаш ҳақидаги лавҳа навбатда тўртинчи бўлди, аммо давомийлиги ва батафсиллиги билан бошқалардан ажралиб туради. Қуйида уч дақиқа-ю 34 сония давом этган лавҳа стенограммаси билан тўлиқ танишиш мумкин (дарвоқе, замончилар портлашни расмийчасига «чақнаш» деб эмас, оддийчасига «портлаш» деб атаган).
«Сурхондарё вилоятида бугун тонгда содир бўлган нохуш ҳодиса жамоатчилик диққат марказида бўлиб турибди. ФВВнинг хабар беришича, 7 декабрь куни соат 03:57 ларда Денов шаҳрида жойлашган икки қаватли ‘Indenim’ савдо мажмуаси биносида портлаш юзага келди. Аниқланишича, портлаш натижасида савдо мажмуаси биноси деворлари қулаб тушган ва ёнғин содир бўлган. Ёнғин қутқарув бўлинмалари соат 04:02 да етиб борган ва ёнғинни соат 04:25 да ўчирган. Ҳодиса жойига бош вазирнинг биринчи ўринбосари Очилбой Раматов бошчилигидаги ҳукумат комиссияси етиб борган. Вайроналар остида қидирув-қутқарув ишлари олиб борилганда, икки кишининг жасади топилган. Мухбиримиз Собит Қайнаров воқеа содир бўлган жойга борди ва тафсилотларни ўрганди.
Бугун, яъни 7 декабрь куни соат тонгги 4:00 лар атрофида Денов шаҳрининг қоқ марказида жойлашган ‘Indenim’ савдо мажмуаси биносида чақнаш содир бўлган. Оқибатда, кўриб турганларингиздек, савдо марказидан умуман асар ҳам қолмаган. Гап шундаки, бугун соат 4:00 лар атрофида Денов шаҳри Мустақиллик кўчасида жойлашган ‘Indenim’ савдо марказида портлаш содир бўлди. Оқибатда икки қаватдан иборат йирик мажмуанинг деворлари қулаб тушган ва буткул вайрон бўлган. Чақнаш бир километр рadiusда жойлашган кўплаб корхона, ташкилот ва муассасаларга ҳам жиддий зарар етказган. Атроф шиша ва турли буюмларнинг синиқлари, қулаб тушган девор парчалари билан тўлган. Маълум бўлишича, ёнғин қутқарув бўлинмалари соат 04:02 да мажмуага етиб борган ва соат 04:25 да ёнғин бартараф этилган. ФВВ маълумотига қараганда, портлаш оқибатидаги вайроналар остидан иккинчи ҳалок бўлган фуқаро топилган. Жароҳат олганлар эса шифохонага ётқизилган.
Кадр: «Севимли» телеканали
Ўрганишларимиз давомида Денов тумани шошилинч тиббий ёрдам бўлимида бўлдик. Шифокорнинг таъкидлашича, мазкур ҳодиса оқибатида жароҳат олган 8 нафар фуқаро олиб келинган. ‘Бугун ушбу ҳодиса сабабли шошилинч тиббий ёрдам бўлимига 8 нафар фуқаро олиб келинди. Уларнинг биттасининг аҳволи қониқарли бўлганлиги сабабли биринчи ёрдамдан кейин ўзининг яшаш жойига кетди. 7 нафар фуқаро ётқизилди. Бир нафар фуқаро оғир тан жароҳати бўлганлиги туфайли операция муолажаси ўтказилди. Операциядан кейин аҳволи ҳозир қониқарли, ҳушига келган. Дори-дармон, уколларини оляпти’, — дейди шифокор.
Кадр: «Севимли» телеканали
Ваҳоланки, мудҳиш воқеа атрофдаги хонадонларда истиқомат қилиб келаётган фуқароларни таҳликага солиб қўйгани бор гап. Биз эса улар билан суҳбатда бўлдик. ‘Мен уйим ағанаяпти, деб қўрқибман. Шовқинларни эшитгандан кейин бирдан қўрқдим-да, мийям ‘тормозланиб’ қолиб, оёқяланг, бошяланг чопибман-да, мана бу ерга келибман. Ойналарим синди, эшикларим синди’, — дейди фуқаро.
Кадр: «Севимли» телеканали
Айни пайтда ҳудудда масъул ташкилотлар томонидан тозалаш ишлари олиб борилмоқда. Мазкур ҳодиса сабаб ва оқибатларини ўрганиш учун республика бош вазирининг биринчи ўринбосари бошчилигидаги ҳукумат комиссияси воқеа жойида суриштирув ишларини олиб бормоқда».
«Ўзбекистон» ва «Ўзбекистон 24» телеканаллари, «Ахборот» ва «Ахборот 24» информацион дастурлари
«Ахборот»нинг 7 декабрдаги ҳисобот эфирларида Деновдаги портлаш ҳақида маълумот берилмади.
