Алишер Усмонов Халқаро қиличбозлик федерацияси президентлигига қайта сайланди

Швейцариянинг Лозанна шаҳрида 27 ноябрь куни Халқаро қиличбозлик федерациясининг (FIE) ҳисобот-сайлов Конгресси бўлиб ўтди.

Конгресс кун тартибидаги асосий масала ташкилотга янги Олимпиада цикли учун раҳбар сайлаш эди. Унда амалдаги президент Алишер Усмонов ғалаба қозониб, ташкилотдаги бошқарувини давом эттирадиган бўлди, деб ёзмоқда МОҚ матбуот хизмати.

Қайд этилишича, мазкур тадбирга расмий меҳмон сифатида Халқаро олимпия қўмитаси президенти Томас Бах ҳам ташриф буюрган, у Алишер Усмоновни сайловдаги ғалабаси билан табриклаган.

Маълумот учун, асли келиб чиқиши ўзбекистонлик бўлган Алишер Усмонов 2008 йилдан бери ушбу халқаро ташкилотни бошқариб келмоқда. У FIE’га 2012 ва 2016 йилларда қайта сайланган.

Шунингдек, сайлов якунларига кўра ўзбекистонликлар ҳам ташкилотнинг бир қатор бўлимлари таркибий қисмига кирди. Жумладан, Ўзбекистон қиличбозлик федерацияси Бош котиби Гулнора Саидова тарғибот қўмитаси, Токио—2020 Олимпиадасида реферилик қилган Аида Ҳасанова эса ҳакамлар қўмитаси таркибига киритилди.