Хориждаги ўзбекистонлик ватандошларнинг ҳуқуқ ва манфаатларини ҳимоя қилишда чет эл мамлакатларидаги ўзбек диаспораларининг ўрни катта. Шу боисдан ҳам Ташқи меҳнат миграцияси агентлиги ва хориждаги ўзбек диаспораларидан 38 таси билан ҳамкорлик шартномалари имзоланган. Ушбу миллий ҳамжамиятларнинг 28 таси Россияда, 6 таси Қозоғистонда, қолган тўрттаси эса мос равишда Украина, Қирғизистон, Япония ва Португалияда.
2021 йилнинг ўтган даврида Ташқи ишлар вазирлиги томонидан тақдим этилган диаспоралар рўйхатига асосан 15 та диаспорал ташкилотлари билан музокаралар ўтказилди. Уларнинг 9 таси Россияда, қолган 6 таси эса мос равишда Дания, Чехия, Туркия, Қозоғистон, Украина ва Францияда. Ташкилотлар рўйхати билан қуйида танишиш мумкин:
- Ростов-Дон (Россия) шаҳридаги «Ўзбекистон» жамоат ташкилоти;
- Самара (Россия) шаҳридаги «Местная узбекская национално-културная автономия городского округа Самара» ташкилоти;
- Оренбург (Россия) вилоятида фаолият юритаётган «Ватан» ижтимоий-ҳуқуқий ёрдам маркази;
- Оренбург (Россия) вилоятида фаолият юритаётган «Национално-културная автономия узбеков Оренбургской области» ташкилоти;
- Сахалин (Россия) вилоятидаги «Узбекская диаспора Сахалинской области» автоном нотижорат ташкилоти;
- Красноярск (Россия) шаҳридаги «Дўстлик» ўзбек миллий-маданий маркази;
- Уфа (Бошқирдистон, Россия) шаҳридаги «Евразия» ўзбек миллий-маданий маркази;
- Челябинск (Россия) вилоятидаги «Бобур» ўзбек-миллий маданий маркази;
- Ханти-Мансийск (Россия) шаҳридаги «Звезда Востока» ўзбек-миллий маданий маркази;
- Орхус (Дания) шаҳридаги Ўзбек ташаббуслари уюшмаси;
- Прага (Чехия) шаҳрида жойлашган «Ўзбегим» маданий-туристик маркази;
- Истанбул (Туркия) шаҳридаги Туркистонликларга маданий ва ижтимоий ёрдамлашиш жамияти;
- Қўстанай (Қозоғистон) вилоятидаги «Шарқ» ўзбек-тожик этномаданий жамоат маркази;
- Харков (Украина) шаҳридаги «Наврўз» лойиҳалаш-қурилиш фирмаси;
- Франциядаги «Мерос» уюшмаси.
Бундан ташқари, АҚШнинг Калифорния штатида таҳсил олаётган ўзбекистонлик Р.Камилов билан боғланиб, Америкадаги ўзбек мигрантлари юзасидан маълумот алмашиб туриш бўйича ҳамкорлик келишуви имзолашга, Жанубий Кореяда яшаётган блогер А.Абдувоҳидов («Корея янгиликлари») билан боғланиб, меҳнат мигрантлари юзасидан маълумот алмашишга ва келишув имзолашга келишилди. Шунингдек, Таиландда истиқомат қилиб келаётган М.Матисманов билан боғланиб, маълумот алмашилган ва келгусида ҳамкорлик қилишга келишилган.
Агентликнинг Хориждаги инфраструктурани ривожлантириш бошқармаси томонидан Қирғизистоннинг Ўш шаҳридаги Ўзбек миллий маркази раҳбари Рашидхон Хўжаев билан учрашув ўтказилди. Учрашувда Қирғизистонда вақтинчалик меҳнат фаолиятини олиб бораётган Ўзбекистон фуқароларининг мақоми, рўйхатга ўтиш тартиби, қайси соҳаларда меҳнат фаолиятини олиб бораётгани, муаммолари ва ечимлари муҳокама қилинган ва ўзаро таклифлар алмашилган.
Бандлик ва меҳнат муносабатлари вазири Нозим Ҳусанов раҳбарлигида 30 август куни «Янги Ўзбекистонда эркин ва фаровон яшайлик!» шоири остида видеоконференцалоқа шаклида ўтказилган маънавий-маърифий тадбирда агентлик билан келишув имзолаб, ҳамкорлик қилиб келаётган хориждаги ўзбек диаспоралари, Россия, Қозоғистон, Япония ва Португалиядаги ватандошлар иштирок этди.
Изоҳ (0)