Албатта, кийилган кийимларнинг бир муддатдан сўнг ранги аввалгидек ёрқин эмаслигини кўриш мумкин. Аммо уларнинг аввалги кўринишини қайтаришнинг бир неча усули мавжуд.

Фото: «Housewife.ru»

Уй шароитида кийимнинг рангини тезда тиклаш учун керак бўлади:

  • истеъмол содаси;
  • сирка;
  • нашатир спирти;
  • аммиак;
  • чой;
  • туз;
  • сиёҳ;
  • резина қўлқоплар.

Умумий тавсиялар

Кийимларга қайта ранг бериш учун биринчи навбатда уларни ювиш керак. Ювилгандан кейин улар истеъмол сода эритмасига солинади: бир литр сув учун бир ош қошиқ сода. Яна ёрқин ранг учун, айниқса, қизил ва кўк ранглар учун эритмага бир қошиқ 9 фоизли сирка қўшилади. Агар кийим сувда ювилса, унга озгина аммиак қўшилса, пушти ранг янада ёрқинроқ бўлади. Рангларнинг тўйинганлиги ва уларнинг ўчмаслиги учун кийимлар аммиак эритмасига ботириб олинади: икки литр сув учун уч ош қошиқ аммиак. Мисол учун, икки соат намлангандан кейин джинси шимлар янгидек мукаммал кўринади. Аммиак ҳидини йўқотиш учун кийимни яхшилаб ювиш тавсия этилади.

Кийимни қайта бўяшда қўлларни ҳимоя қилиш учун резина қўлқоп кийишни унутмаслик лозим.

Алоҳида ранглар учун тавсиялар

Қаймоқранг, жигарранг, малларанг нарсалар чой барглари ёрдамида тикланади. Рангнинг интенсивлиги чойнинг кучига боғлиқ. Жигарранг кийимлар яшил ёнғоқ қобиғининг қайнатмасида чайилиши билан янгиланади. Шу билан бир қаторда, қайнатмада чўткани намлаш орқали қуруқ кийимга суриш мумкин. Лекин, аввало, матонинг ранги чойга мос келишини текшириш лозим. Нейлон колготкалар чой баргларида ювилса, улар узоқ муддат ёрқин рангга эга бўлади.

Яшил матолар учун сувга аччиқтош қўшилади ва мато ювилади. Кўк рангли нарсаларни истеъмол содаси билан ювиш фойдали. Мовий ва сариқ ипак янги ёки қуруқ апельсин қобиғи қайнатмаси билан янгиланади.

Агар кашта тикилган кийимлар рангини янгилаш керак бўлса, ювишдан олдин уларни тузли эритмада намлаш зарур: бир литр илиқ сув учун икки чой қошиқ туз. Кейин кийимлар кир совун билан ювилади. Совуқ сувда чайилгач, сиқмасдан қуритишга қўйилади. Нақшли кийим ички томондан дазмолланади, шунда каштали либосларнинг умри ва ранги узоққа етади.

Қора рангли кийимлар аввал ювилади, кейин шўр сув ва ёзиш учун ишлатиладиган озгина қора сиёҳда ювилади. Бошқа рангдаги нарсаларни тиклаш учун ҳам мос рангдан фойдаланиш мумкин. Шунингдек, қора кийим учун тамаки эритмаси ҳам ёрдам беради: бир литр сув учун ўн беш грамм тамаки. Ушбу эритмада намланган чўтка билан кийимни бўяш ҳам мумкин.