«Отам машҳур бўлса-да, бой бўлмаганмиз». Ҳамза Умаровнинг ўғли Шуҳрат Умаров отасининг райини қайтара олмай актёр бўлгани ҳақида

Ўзбекистон халқ артисти Ҳамза Умаровнинг ёлғиз ўғли Шуҳрат Умаров кино соҳасида фаолият юритишини кўпчилик билмайди. Журналист Наргиза Муродова марҳум актёрнинг фарзанди билан суҳбатда бўлди ва Ҳамза Умаров шахсияти билан боғлиқ баъзи саволларга жавоб олди.

— Болалигимда актёр бўлишни истамаганман. Менга кўпроқ цирк санъати ёқарди. Мактабдан кейин цирк томошаларига боришни, артистлар ҳаётини ўрганишни ёқтирардим. От спорти билан бажариладиган трюклар жон-у дилим эди. Мактабни тамомлаган йилим Москва киномотография институтидан бир гуруҳ ўқитувчилар келиб, уч босқичли танлов асосида Ўзбекистондан талабалар саралаб оладиган бўлишди. Отамнинг таклифлари билан танловда иштирок этдим. Бу шунчаки отамни хурсанд қилиш ва истакларини рад этмаслик эди, холос. Биринчи босқичда иштирок этганимдан сўнг, иккинчи босқичга таклиф этишмади. Қабул қилишмабди деб юрганимда бирдан ўқишга қабул қилинганим ва 15 та талаба билан ўқишга жўнаб кетишимни айтишди. Бу хабардан дадам жуда хурсанд бўлди.

«Отамнинг умри сафарда ўтди»

— Отам машҳур актёр, деган ўй ҳаёлимга келмаган. У инсон мен учун меҳрибон ва оилапарвар ота эди. Уни жуда кам кўрардик. Чунки у йилларда ҳали телевидения соҳаси унчалик яхши ривожланмаган, актёр ва қўшиқчиларнинг умри гастрол сафарларида ўтарди. Атрофимдаги инсонлар ҳам отанг санъаткор дейишмасди. Назаримда отамнинг машҳурлигини 10-синфларда ҳис қилганман. Отам раҳматли ҳам ҳар нарсани ўз кучим билан эришишимни истаган. Ўқишни тамомлаб, Москвадан қайтган йилим кичик сарой саҳналари ва ресторан залларида спектакллар намойиш этиб юрдик. Балки, ўзбек театрларидан бирига борганимда отамнинг ҳурмати учун ҳам мени ишга олишган бўлишарди. Аммо буни мен ҳам дадам ҳам истамади. Чунки мен ўзбек тилида эркин гаплашолмасдим.

«Отам машҳур бўлса-да, бой бўлмаганмиз»

— Актёрнинг ихтиёри ўзида эмас. Бу соҳа вакиллари режиссёрдан таклиф кутиб яшашга мажбур. Таклифлар кам бўлган деёлмайман, ҳар бирини ўрганиб маъқул кўрган лойиҳада иштирок этаман. Актёр истеъдодини арзонга сотиши, ишлашим керак экан, деб ўзини ўққа чўққа уриши керак эмас. Ҳар бир актёрнинг ўз даври бўлади. Фақат у қачон келиши номаълум. Барча инсонлар сингари бизнинг оиламизда ҳам моддий қийинчиликлар бўлган. Отам машҳур актёр бўлгани билан моддий жиҳатдан у қадар бой бўлмаганмиз. Шунинг учун сотувчилик билан шуғулланганман. Бундан оғринмайман, муҳими меҳнат қилиб, ҳалол пул топилса бўлди.

Эслатиб ўтамиз, Ҳамза Умаров иштирокидаги  «Ўткан кунлар», «Маҳаллада дув-дув гап»,  «Чинор остидаги дуэл», «Али бобо ва қирқ қароқчи» каби фильмлар ҳалигача томошабинлар эътиборидан тушмаган. Унинг икки қиз ва бир ўғил фарзандлари бор.