Зангиотада онасига тазйиқ ўтказиб уйида жанжал кўтарган шахс унга нисбатан ИИБ ходимлари куч ишлатганини айтмоқда. ИИВ ҳолатга изоҳ берди

Ижтимоий тармоқларда Зангиота тумани ИИБ ходимлари томонидан фуқарога тан жароҳати етказилгани тўғрисида хабарлар тарқалди. Ҳолат юзасидан Ички ишлар вазирлиги матбуот котиби Шуҳрат Ғиёсов маълумот берди.

Маълум қилинишича, 2021 йилнинг 11 ноябрь куни кечки соат 20:00 ларда Зангиота тумани, «Рамадон» маҳалла фуқаролар йиғини, Марказий кўчасида яшовчи фуқаро У.Х. (она) мурожаат қилиб, ўғли, ишсиз, 1974 йилда туғилган У.М. мунтазам равишда спиртли ичимликлар истеъмол қилишини, айни вақтда уйда жанжал қилиб, онаси ва яқинларига тазйиқ ўтказаётганини айтиб, ёрдам сўраган.

Воқеа жойига етиб борган Зангиота тумани ИИБ ходимлари томонидан тартиббузар қўлга олиниб, унга нисбатан Маъмурий жавобгарлик тўғрисидаги кодекснинг 183 (майда безорилик), 187 (жамоат жойларида алкоголь маҳсулотини истеъмол қилиш) ҳамда 194 (ички ишлар органлари ходимининг қонуний талабларини бажармаслик) моддалари билан материаллар расмийлаштириш вақтида, фуқаро У.М. ИИБнинг маъмурий биносидан қочиб кетиб, гўёки унга нисбатан куч ишлатилгани ҳақида ёлғон маълумотларни тарқатган.

Ҳозирда фуқаро У.М. ички ишлар органларига олиб келинган ҳамда унга нисбатан, юқоридаги моддаларга қўшимча равишда Маъмурий жавобгарлик тўғрисидаги кодекснинг 40-моддаси (туҳмат) билан материаллар расмийлаштирилиб судга тақдим этилган.