APLda “Manchester Yunayted” “shporlar”ga qarshi, A Seriyada “Roma” — “Milan” to‘qnashuvi, Bundesligada “Bavariya” Berlinga sayohat qiladi. Uik-endning markaziy o‘yinlari

APL. Chempionat “tulkisi” uyg‘onayotgan “Arsenal”ga qarshi, “Tottenhem” — Sulsher uchun so‘nggi imkoniyat

“Lester” — “Arsenal”, 30-oktabr, 16:30

Brendan Rojers shogirdlari 9 turdan so‘ng 14 ochko bilan 9-o‘rinda bormoqda. Ushbu mavsumda “tulkilar” 4 ta g‘alaba, 2 ta durang va 3 ta mag‘lubiyat qayd etdi. Oxirgi 4 turdan buyon “Lester” mag‘lubiyatga uchramay kelmoqda: “Byornli” (2:2), “Kristal Pelas” (2:2), “Manchester Yunayted” (4:2) va “Brentford”ga (2:1) qarshi uchrashuvlar jamoaning shijoatini yanada oshirdi.

Chempionatning 3-turida “Arsenal” “Manchester Siti”dan 0:5 hisobidagi mag‘lubiyatni qabul qilib olganidan so‘ng vaziyatni chuqur tahlil qilib, o‘zgarishga erishdi. Shundan keyingi 6 turdan buyon mag‘lubiyatsiz seriyani davom ettirayotgan Mikel Arteta shogirdlari 10-turda ham bu natijani to‘xtatmaslik istagida. Hozirda “kanonirlar” 14 ochko bilan 10-o‘rinni egallab turibdi.

Jamoalarning o‘zaro oxirgi besh uchrashuvida: “Lester” ikki marta g‘alaba qozongan, “Arsenal”da ham ikkita g‘alaba mavjud, bitta o‘yin durang natija bilan yakunlangan.

“Tottenhem” — “Manchester Yunayted”, 30-oktabr, 21:30

“Shporlar” 9 turdan so‘ng APLning 6-o‘rnini egallab turibdi. Ularning hisobida 15 ochko mavjud. Oxirgi paytlar Nunu Eshpiritu Santu shogirdlari uchun omadsiz davr boshlangan. Avvaliga Konferensiyalar Ligasida “Vitess”ga qarshi o‘yinda mag‘lubiyatga uchragan bo‘lsa, APLda “Vest Hem”ga imkoniyatni boy berdi. Jamoaning asosiy muammosi himoya chizig‘i bo‘lib turibdi. Hujumda Son va Keyn harakat qilgan bo‘lsa-da, ojiz nuqta sabab mag‘lubiyatga uchradi.

Lekin yana bir natijani unutmaslik lozim, “Tottenhem” APLda o‘z uyidagi 4 o‘yinning 3 tasida g‘alaba qozongan — “Manchester Siti” (1:0), “Uotford” (1:0), “Aston Villa” (2:1).

“Manchester Yunayted” esa 14 ochko jamg‘argan holda 7-o‘rinni band etib turibdi. Avvalgi turda “Manchester Yunayted” o‘z uyida “Liverpul”ga 0:5 hisobida mag‘lub bo‘ldi. “Tottenhem”ga qarshi o‘yin Sulsher uchun oxirgi imkoniyat bo‘lishi mumkin. Jamoa “Liverpul”ga qarshi o‘yindan qanday xulosa chiqargani “shporlar”ga qarshi bahsda aniq bo‘ladi.

Qolgan uchrashuvlar:

La Liga. Ronald Kuman iste’fosidan so‘ng “Barselona” ilk uchrashuvini “Alaves”ga qarshi o‘tkazadi, “Real” “Elche” mehmoni bo‘ladi

“Barselona” — “Alaves”, 30-oktabr, 00:00

Oktabr oyining o‘rtalarida “Barselona” “Valensiya”ni 3:1 hisobida mag‘lub etdi, keyin esa Chempionlar Ligasining 3-turida Kiyevning “Dinamo”si ustidan 1:0 hisobida g‘alaba qozondi.

Kataloniyaliklar La Ligadagi oxirgi ikki turni Madrid jamoalariga qarshi o‘tkazdi. Avvaliga “Real” (1:2) ga qarshi o‘yindagi mag‘lubiyat, undan so‘ng “Rayo Valyekano”ga (0:1) ham imkoniyat boy berilgach, rahbariyatning toqati toq bo‘ldi. Jamoa bosh murabbiyi Ronald Kuman iste’foga chiqarildi va uning o‘rnini vaqtinchalik ispaniyalik mutaxassis Serxi Barxuan egalladi. “Barselona” 15 ochko bilan 9-o‘rinda bormoqda. Grand jamoa uchun bu yaxshi natija emas.

“Alaves” esa so‘nggi 2 ta o‘yinda ketma-ket g‘alaba qozondi. Jamoa 9 ochko jamg‘argan holda 16-o‘rinni band etib turibdi. To‘plar nisbati — 5:13. “Barselona”ga qarshi uchrashuvda jamoa yetakchisi Fernando Pacheko sheriklariga yordam bera olmaydi.

Qolgan uchrashuvlar:

A Seriya. Rim va Milan jamoalari to‘qnashuvi, “Atalanta” “Latsio”ni qabul qiladi, “Napoli” Frank Riberi to‘p suradigan jamoaga qarshi

“Roma” — “Milan”, 31-oktabr, 23:45

Joze Mourinyo shogirdlari chempionatni yaxshi boshlagan edi, lekin oxirgi turlarda jamoaning ishlari yurishmayapti. Konferensiyalar Ligasida “Budyo Glimt”ga qarshi o‘yindagi qaqshatqich 1:6 hisobidagi mag‘lubiyat, Italiya chempionatida esa “Napoli” (0:0) va “Yuventus”ga (0:1) qarshi o‘yinlar Joze Mourinyoni jiddiy o‘yga toldirib qo‘ydi. Mourinyo “Roma” rivojlanish bosqichida ekanligini ta’kidlab kelmoqda. “Bo‘rilar” prezidenti ham portugaliyalik mutaxassisning so‘zlarini qo‘llab-quvvatlamoqda.

“Milan” esa Pioli qo‘l ostida Italiya chempionati peshqadami “Napoli” bilan bir xil 28 ochko jamg‘argan holda ikkinchi o‘rinda bormoqda. Joriy mavsum chempionatda faqatgina bir marta “Yuventus”ga qarshi o‘yinda (1:1) durang natija qayd etdi. To‘plar nisbati — 23:9. Urilgan gollar hisobi bo‘yicha faqatgina “Inter”dan ortda (24 ta gol).

Qolgan uchrashuvlar:

Bundesliga. “Bavariya” Berlinda mehmon bo‘ladi, “Borussiya D” “Kyoln”ga qarshi “jang qiladi”

“Union Berlin” — “Bavariya”, 30-oktabr, 18:30

“Union” jamoasi Bundesligada 5-o‘rinda bormoqda. Jamoa hisobida 16 ochko mavjud. Chempionatda 4 ta g‘alaba, 4 ta durang va 1 ta mag‘lubiyat qayd etgan. Koronavirusga chalingani sabab Berlinliklarning asosiy futbolchilari Marvin Fridrix va Rik van Drongelen uchrashuvni o‘tkazib yuboradi.

“Bavariya” ortda qolgan 9 turdan so‘ng 22 ochko bilan chempionat yetakchisi bo‘lib turibdi. Yulian Nagelsmann shogirdlari 7 ta g‘alabaga erishgan bo‘lsa, bitta o‘yinda durang natija qayd etgan, bitta o‘yinda mag‘lubiyatga uchragan.

Germaniya Kubogida myunxenliklar “Borrusiya M” ga 0:5 hisobida sharmandali mag‘lub bo‘ldi va musobaqani tark etdi. “Bavariya”da ham koronavirusga chalinganlar bor, faqat murabbiylar orasida. Jamoa bosh murabbiyi Nagelsmann izolyatsiyaga olingan.

Qolgan uchrashuvlar:

Liga 1. Kilian Mbappe ishtirok etmaydigan turda “PSJ” amaldagi chempionga qarshi bahs olib boradi, “Lens” “Lion” mehmoni bo‘ladi

“PSJ” — “Lill”, 29-oktabr, 00:00

Parijliklar Fransiya chempionatida yetakchilikni davom ettirmoqda. Jamoaning hisobida 11 turdan so‘ng 28 ochko mavjud. Avvalgi turda “PSJ” “Marsel” mehmoni bo‘ldi. Lionel Messi, Neymar va Kilian Mbappe bir vaqtning o‘zida maydonda bo‘lishiga qaramasdan, o‘yin 0:0 hisobi bilan yakunlandi.

Kichik jarohati sabab Kilian Mbappe “Lill”ga qarshi kechadigan uchrashuv qaydnomasidan o‘rin olmadi.

“Lill” esa 15 ochko bilan 10-o‘rindan joy olgan. Fransiyaning amaldagi chempioni mavsumni omadsiz boshladi. Lekin oxirgi 5 turdan buyon faqatgina bitta mag‘lubiyat qayd etdi va 10 ochko jamg‘arishga muvaffaq bo‘ldi. “Lill” ushbu mavsumda mehmondagi faqat bitta uchrashuvda g‘alaba qozondi.

Qolgan uchrashuvlar:

Ma’rufjon Ochilov tayyorladi