Шавкат Мирзиёев Наманганда ташрифи давомида Афғонистон чегарасида ўзбекистонлик бир аскар ҳалок бўлганини маълум қилди. Бу ҳақда Telegram’даги «Нигоҳ» канали хабар берди.

«Куни кеча ҳам давлатимиз чегарасини бузиб ўтишга уриниш бўлди. Бир наркобарон ҳаракат қилди. Лекин бизнинг дахлсизлик масаласида позициямиз қатъий, керак бўлса, чегарамизни ҳимоя қилиш учун қурол ишлатамиз. Кечаги вазиятда ҳам ўз вазифасини шараф билан бажарган бир аскаримиз қаҳрамонларча ҳалок бўлди. У шу юрт фарзанди – наманганлик эди», – дейди Шавкат Мирзиёев.

Аввалроқ Шавкат Мирзиёев БМТ Бош ассамблеясида Афғонистон муаммоси ҳақида гапириб, «Афғонистонни яккалаб, уни муаммолар гирдобига ташлаб қўйиш мумкин эмас», деганди.

Эслатиб ўтамиз, 14 август куни Афғонистон шимолидаги Мозори-Шариф шаҳри (Термиздан 58 километр жанубда жойлашган) «Толибон» қўлига ўтгани маълум бўлганди. Шаҳар топширилгач, Афғонистон мудофаа ва хавфсизлик кучлари Ўзбекистон билан чегара томон чекинди, 15 августга ўтар кечаси Ҳайратон ва Термиз оралиғидаги кўприкда юзлаб афғонистонликлар тўпланди.

15 август тонгида Ўзбекистон томони Афғонистон Қуролли кучларининг ҳарбий хизматчиларидан иборат 84 кишилик гуруҳни қабул қилгани (улар орасида уч нафар ярадор ҳам бўлган), улар ДХХ Чегара қўшинлари томонидан қўлга олиниб, Ўзбекистон ҳудудида вақтинча бўлиб туриши ташкил этилгани маълум бўлди. Шу куни соат 10:00 ҳолатига кўра, ушбу кўприкдаги вазият юмшади. Афғонистонликларнинг асосий қисми кўприкни тарк этди. Пешинга яқин эса Ҳайратон кўприги атрофидаги вазият бутунлай барқарорлашди. Ўзбекистон расмийларининг маълум қилишича, Афғонистон билан чегарада барча хавфсизлик чоралари кўрилган.