Қирғизистонда Қизил китобга киритилган жайронлар қирилиб кетди. Энди улар Ўзбекистондан олиб келинади

Қирғизистон Фанлар академиясининг Биология институти умуртқали ҳайвонлар лабораторияси раҳбари Асқар Давлетбаков 22 сентябрь куни ўтказилган матбуот анжуманида мамлакатда Қизил китобга киритилган жайронлар популяцияси қирилиб кетганини айтди.

Қирғизистонда жайронлар Қизил китобга киритилган ва уларни овлаш тақиқланади. Жайронлар Қирғизистондан ташқари Ўзбекистон, Қозоғистон ва Эрон ҳудудларида яшайди.

Давлетбаковнинг сўзларига кўра, мамлакатда жайронларнинг борлиги ҳам, «улар Қирғизистонда мавжуд бўлгани» ҳам бутунлай «унутиб қўйилган». Шунингдек, у келаси ой Ўзбекистондан Қирғизистонга бир гуруҳ жайронларни олиб келиш режалаштирилганини айтди.

«Уларни Қирғизистонда ушбу популяцияни тиклаш учун мослаштирамиз. Ҳозирча 15 бош бўлади, лекин ҳар йили уларнинг сонини кўпайтирамиз. Қозоғистон ва Озарбайжон каби давлатлар билан музокара ўтказамиз», — деди Давлетбаков.

Биология институти лаборатория раҳбарининг қўшимча қилишича, жайронлар ҳатто Совет Иттифоқи даврида, чорвачилик ва деҳқончилик ривожлантирилаётган пайтда йўқ қилина бошлаган.

«Бу жуда кўп қарама-қаршиликни келтириб чиқарган, жайронлар текисликда яшайди. Илгари улар Чуй водийсида яшаган. Бугун улар умуман йўқ, энди уларни бошқа мамлакатлардан олиб келишимизга тўғри келади », — дея қўшимча қилди Давлетбаков.

Ҳайвонлар Қирғизистонга олиб келингандан сўнг вақтинча кушхоналарда — ярим бўш жойларда сақланади. Давлетбаковнинг ишонтиришича, корпус аллақачон тайёр ва бутун жараён бошланган, фақат ҳужжатлардаги расмиятчиликларга риоя қилиш керак.

2019 йилда Қирғизистонда Қизил китобга киритилган жайронларни қайта кўпайтириш режалаштирилган эди. Ўша йили Атроф-муҳитни муҳофаза қилиш давлат агентлигининг ўша пайтдаги раҳбари Мирслав Омонқулов шундай режалар ҳақида гапирган. Омонқулов жайронларни Қозоғистондан импорт қилиш орқали популяция қайта тикланишини айтган.