Ўзбекистон Қаҳрамони, Ўзбекистон халқ артисти Муножот Йўлчиева «Дарё» интернет нашрига эксклюзив интервью берди. Суҳбат давомида баъзи эстрада хонандаларининг муносабатидан ранжигани ва мақом санъатига ҳурматсизлик қилишгани ҳақида сўзлаб берди.

Халқимиз санъатнинг қадрига етади, ривожланишига тўсқинлик қилмайди. Ижодкорлар реп, рок, жаз ёки академик хонандалик йўналишида ҳам ижод қилиши мумкин. Рэпер йигитлар ҳам ижод қилишди, оқар сув ўзи йўлини топганидек, вақт кимнинг қандай ижодкор эканлигини кўрсатди. Мақом хонандалари бор овози бўлиб, жонини жабборга бериб томири бўртиб чиққунча қўшиқ айтганида, битта эстрада хонандаси башанг кийиниб келиб, дунё ташвишларидан озод инсондек фонограммада қўшиқ айтиб кетарди. Бунга катта пул олиши бизни қаттиқ афсуслантирарди.

Шунда ҳам биз фонограммада қўшиқ айтамиз ёки улар жонли ижрода қўшиқ куйласин демадик. Вақт ҳаммасини ўз ўрнига қўйишини, кун келиб пойдевори мустаҳкам мумтоз санъати қадр топишини кутдик. Ундай кейин эстрада хонандалари ҳам жонли ижрода куйласин, деган талаблар бўлди, хонандалар тингловчиларнинг танловига кўра фонограмма ёки жонли ижрода куйлайдиган даврлар келди.

Аслида эстрада хонандаларига ҳам осонмас. Кичкинагина овози билан қўшиқ дардини тингловчига етказиб бериш ҳам бир санъат ҳисобланади. Майли, жонли ижрода қўшиқ айтмасин, аммо шу ишни қилаётган инсонларнинг ҳурматини жойига қўйсин, устозларни кўрганда ҳеч бўлмаса «Ассалому алайкум», деб қўйсин. Шундай кунлар ҳам бўлдики, баъзи эстрада хонандалари мақом ашулачиларини менсимай тепалаб ўтиб кетишди.

Бир куни тўйга бордик. Аксига олиб «свет» ўчиб қолган экан. Машҳур санъаткорлар тўйни бошлолмай ўтиришибди. «Муножотхон, сиз бошлаб туринг, ‘свет’ келса биз давом эттирамиз», дейишди. «Буларнинг ҳурмати бор, ҳар ҳолда халқ артистлари» деб ҳайрон бўлсам, устозим кулиб «Булар жонли айтишолмайди», деганди.

Муножот Йўлчиева, Ўзбекистон Қаҳрамони.