Юлдуз Усмонова сабаб санъатга кириб келган, Зиёданинг «Тор кўча» клипи билан танилган Зарина Йўлдошева мураккаб тақдири ҳамда актрисаликни давом эттирмаслиги ҳақида (видео)

Хонанда Зиёданинг «Тор кўча» клипи орқали томошабинлар эътиборига тушган Зарина Йўлдошеванинг актрисаликка қадам қўйишига Ўзбекистон халқ артисти Юлдуз Усмонованинг «Мен сени севаман» қўшиғига ишланган клип сабаб бўлган. Айнан шу клипдан сўнг Заринага режиссёрлар томонидан кўплаб лойиҳалардан таклифлар туша бошлади. Кейинроқ ёш актриса Улуғбек Раҳматуллаевнинг «Билмади» клипида ҳам суратга тушди. Айни пайтда Зарина бош ролни ижро этаётган «Ўжар ҳомиладор» сериали «Миллий» телеканалида эфирга узатилмоқда.

Журналист Наргиза Муродова Зарина Йўлдошева билан интервью ташкиллаштирди. Интервью давомида актриса ота-онасидан эрта айрилгани, меҳрибонлик уйида улғайгани, санъатга қандай қадам қўйгани ва келажакдаги режалари ҳақида сўзлаб берди.

«Ота-онамдан эрта айрилганман»

Ота-онам болалигимда вафот этишган. Дадамни эслолмайман, онам эса 12 ёшимда касаллик сабаб вафот этди. Бувим кексайиб қолгани ва моддий жиҳатдан қийинчиликларга дуч келгани учун мен, синглим ва укамни болалар уйига топширишга мажбур бўлган. Тўрт йил давомида меҳрибонлик уйида тарбияландим. Дарсдан кейин рақс тўгарагига қатнашардим. Шунда рақс мураббийим «Сен Хореография олий мактабида ўқишинг керак, қобилиятинг бор», деди. Мактабни тамомлаганимдан кейин қўлимдан ушлаб, Тошкентдаги Хореография олий мактабига олиб келиб, ўқишга жойлаштиришган. Классик рақс ҳаракатларидан бехабар бўлганим учун кўп қийналганман, дугоналарим томонидан камситилган пайтларим ҳам бўлган. Тошкентга келиб яшашим осон кечмади. Моддий қийинчиликлар сабаб тўйларга чиқиб пул ишлашга ҳам мажбур бўлганман. Аммо бу ишимдан бувим қаттиқ ранжиган. Шу боис қайта тўйларга чиқмаганман.

«Юлдуз Усмонова сабаб актрисаликка қадам қўйдим»

2017 йили ансамблимиз билан Юлдуз Усмонованинг «Эй азиз инсон» концерт дастурида иштирок этганмиз. Юлдуз опа созандалар билан машқ қилаётганида бир четда мароқ билан қўшиққа рақс тушганман. Шунда Юлдуз опа ёнларига чақириб, шу қўшиққа якка рақс тушсин, деган.

Бир неча ойдан сўнг, ярим кечаси Юлдуз Усмонованинг маъмури қўнғироқ қилиб, қайсидир актриса клип ‘съёмка’сига келолмагани ва ўрнига мен суратга тушишимни айтди. Рости, бу таклифга кўнишим осон бўлмади. Суратга олиш ишлари бор-йўғи 30-40 дақиқа давом этди. ‘Съёмка’дан сўнг клипдаги эпизодим учун 50 АҚШ доллари беришди. Бу 17 ёшимгача топган энг кўп пулим эди. Мана шу воқеадан сўнг клиплардан таклиф тушса, рад этмайдиган бўлдим.

«Ўзимни бечора кўрсатиб, атрофдагиларнинг раҳмини келтиргим келмайди»

Мен ўзимни бечора кўрсатиб, одамлардан нимадир тилаб яшашни истамайман. Ҳатто санъатга кирганимдан кейин ҳам анча муддат атрофдагиларга шахсий ҳаётим ҳақида айтмаганман. Меҳрибонлик уйи раҳбарини «Одамийлик мулки» кўрсатувига таклиф этишганида, менга қўнғироқ қилиб: «Сен ҳам бориб интервью бер», деди. Рости, шу даражага етишимга ҳисса қўшган инсонга рад жавобини беролмадим. Кўрсатув эфирга кетгач, атрофимдаги инсонлар шахсий ҳаётимдан хабар топишди.

«Кимгадир пул бериб, роль ижро этмаяпман»

Шу кунгача ҳеч бир режиссёрга роль сўраб мурожаат қилмаганман. Таклиф этишса, имкон даражасида ижро этаман. Аммо ўзимни қобилиятли актриса деб билмайман. Ёши катта актрисалар билмаганларимни ўргатишади, институтда ўқишимни тавсия қилишади. Баъзи ёш актрисалар эса ортимдан негатив гаплар тарқатиб, ғашимни келтиришади. «Ўзини бечора кўрсатиб, пиар қиляпти ёки пул бериб роллар ижро этяпти», деган гаплар ҳам қулоғимга чалинди. Менимча, ҳеч бир инсон ота-онаси вафот этганлиги ҳақида гапириб обрў олишни истамайди. Мен санъатга пул бериш эмас, пул ишлаш учун қадам қўйганимни ҳам кўпчилик билишади.

«Синглим ва укамни оёққа қўймагунимча шахсий ҳаётим ҳақида ўйлай олмайман»

Яширмайман, ота-онамнинг уйи бўлмаган. Ука билан синглим меҳрибонлик уйидан келгач, ўз уйида яшашини истайман. Шу боис институтда ўқишни истамадим. Тезроқ пул топиб, уларга шароит яратиб беришим керак. Ўтган йили муддатли тўлов эвазига икки хонали уй олдим. Уни таъмирлатиб, керакли жиҳозлар билан тўлдирдим. Келаси йил синглимни турмушга бермоқчимиз, ундан кейин укамнинг ўқишига жиддий эътибор бераман. Шу боис ҳозирча турмушга чиқиш ниятим йўқ.

«Актрисаликни давом эттириш ниятим йўқ»

Келажагимни санъат соҳасида тасаввур этмайман. Актрисаликни давом эттириш ниятим йўқ. Фарзандларим менда бўлмаган тўкис-тугал оилада вояга етишларини истайман.

Бундан ташқари, Зарина Йўлдошева интервью давомида меҳрибонлик уйидаги ҳаёти ва давлат томонидан берилган уйни рад этганлиги ҳақида ҳам сўзлаб берди. Видеони тўлиқ қуйида томоша қилишингиз мумкин.