“Milliy” telekanalida efirga uzatilgan “Daydi qizning daftari” teleseriali qisqa fursat ichida tomoshabinlar e’tiborini qozondi. Unda bosh rolni ijro etgan Fotima Berdiyeva Taxmina obrazi kinodagi debyuti bo‘lishiga qaramay, o‘z ishini mahorat bilan uddalagan, deyish mumkin. Jurnalist Nargiza Murodova aktrisa bilan intervyu tashkillashtirdi.

Bolaligimdan san’atga qiziqqanman. Oilamizda san’atkorlar bo‘lmaganligi bois qiziqishimni avvaliga qo‘llab-quvvatlashmagan. Juda ko‘p kastinglarda ishtirok etganman. Afsuski, ba’zi rejissorlar ko‘zim “gapirmasligi”, boshqalar iqtidorli emasligim sabab rollarga tasdiqlashmagan. Eng yomoni, bosh rol uchun 1500 AQSh dollari so‘rashgan yoki yotoq taklif etgan paytlari ham bo‘lgan. Ana shu voqealardan so‘ng hayotimni boshqa soha bilan bog‘lashga qaror qilganman. Kiyev shahrida iqtisod yo‘nalishi bo‘yicha o‘qidim. Ammo bu sohada ishlolganim yo‘q.

Taxmina roliga qanday tanlangani va buni oila a’zolari qanday qabul qilgani haqida

“Ummon” guruhining “Qo‘g‘irchoq” va Jasur Mavlonovning “Mayin-mayin” kliplarida suratga tushganimdan so‘ng, o‘zimni yana bir bor seriallarda sinab ko‘rishga qaror qildim. Taxmina roli uchun talabgorlar juda ko‘p edi. Ular orasidan yoshim va tashqi ko‘rinishim rolga mos kelgani uchun kaminani tanlab olishdi.

Rostini aytsam, serialda suratga tushganimdan biroz afsuslandim. Chunki uni biror marta oila a’zolarim orasida ko‘rolmadim. Ba’zi sahnalardan uyalaman.

“Kiyev ko‘chalarida och-nahor yurib, ofitsiant bo‘lib ishlashga majbur bo‘lganman”

Kiyevga yaqin tanishimga ishonib, o‘qishga borganman. Uning uyida turib institutga hujjat topshirishim kerak edi. Lekin tushunmovchilik sabab uyidan chiqib ketishimga to‘g‘ri kelgan. O‘sha kuni to tonggacha Kiyev ko‘chalarida chamadon sudrab yurganman. Institut shartnomasi uchun berilgan pulni ishlatishni istamay, och qolishga ham rozi bo‘lganman. Eng yomoni, rus tilini ham yaxshi bilmasdim. Kunlik ijara uyga joylashganman. Uch xonali uyda 30 dan ortiq odam yashar ekan. Bir necha kun o‘sha yerda yashab, institutga o‘qishga kirganman.

Musofirchilikda o‘qish oson emas. Puldan qiynalgan paytlarim juda ko‘p bo‘lgan. Shu bois 18 yoshimdan boshlab oshxonada ofitsiant bo‘lib ishlaganman.

“San’atdagi karyeram nihoyasiga yetdi”

San’at — xobbim. U bilan hayotimni bog‘lash niyatim yo‘q. Kelajakda oddiy o‘zbek ayollari singari oilani tanlab, bolalar tarbiyasi bilan shug‘ullanishni istayman. Menimcha, “Daydi qizning daftari” serialidan so‘ng san’atdagi karyeram o‘z nihoyasiga yetadi.

“Taxmina emas, Fotimaman”

Men Taxmina emas, Fotimaman. Yashash sharoitim, fe’l-atvorim va fikrlarim ham obrazimdan butunlay farq qiladi. Men Taxminadek sodda va ishonuvchan emasman. Shu bois negativlarga e’tibor bermayman. Keyin ba’zi internet foydalanuvchilari xorijga turmushga chiqayotganimni ham tanqid qilishyapti. Inson o‘zi istagan va ishongan insoni bilan oila qurishga haqli. Tanlagan insonim bokulik. U yerdagi odamlarning fikri biznikidan ancha farq qiladi. O‘tmish an’analariga sodiq qolgan millat hisoblanishadi. Shu bois odamlar meni yengil hayotga intilishda ayblashga shoshilmasliklari kerak.

Ma’lumot uchun, Fotima Berdiyeva 2000-yil Toshkent shahrida tug‘ilgan. Oilada to‘rt o‘g‘il va bir qiz. Debyut rolini “Daydi qizning daftari” serialida ijro etdi.