6 сентябрь куни янги ўқув йилининг бошланиши билан Тошкент кўчаларида узундан узоқ тирбандликлар юзага келди. Тошкент шаҳар Транспорт бошқармасининг маълум қилишича, тирбандликларга енгил автомобиллар ва йўналишсиз таксиларнинг ортгани сабаб бўлмоқда.
«Бу эса ўз навбатида автобус ва йўналишли таксилар оралиқ вақтининг ошишига олиб келди», — дейилади бошқарма хабарида.
Шунингдек, баёнотда таъкидланишича, ўқув мавсумининг биринчи кунида йўналишсиз такси хизматларига бўлган катта талабдан айрим ҳайдовчилар кўпроқ фойда олиш мақсадида сунъий равишда йўналишсиз такси хизматлари нархини кескин ошириб юборган ва аҳолининг ҳақли эътирозларига сабаб бўлган.
Транспорт бошқармаси аҳолига йўналишсиз такси хизматларидан мобил илова орқали фойдаланишни тавсия этган — «бунда вақтингизни ва пулингизни тежайсиз». Шу билан бирга, жамоат транспортида ҳаракатланишни режалаштириш ва кузатиш учун мўлжалланган мобил иловалар орқали керакли транспорт йўналишларини онлайн тарзда кузатиш имкони яратилгани қайд этилган. Ушбу иловадан фойдаланиб, керакли йўналишнинг келиш вақтини билиб, йўлини режалаштириш орқали вақт тежаш мумкин.
Тиғиз вақтда Тошкент шаҳар аҳолисига жамоат транспортининг 1 397 та ҳаракат таркиби, шу жумладан, 850 та автобус ва 547 та микроавтобус хизмат кўрсатган.
Бундан ташқари соат 07:30 дан 09:00 гача метрополитеннинг «Чилонзор» метро йўналишида 3 дақиқа, «Ўзбекистон» йўналишида 4 дақиқа ва «Юнусобод» йўналишларида 7 дақиқалик оралиқ масофа билан метро поездлари ҳаракатланган.
Изоҳ (0)