Қашқадарё вилоятининг Чироқчи туманида фаолият юритувчи блогерга нисбатан қамоққа олиш эҳтиёт чораси қўлланди. У ёлғон хабар беришда айбланмоқда. Бу ҳақда «Дарё» мухбири хабар берди.
Мазкур воқеа ҳақида расмий маълумот берган вилоят ИИБ ахборот хизматининг ёзишича, блогер ва унинг шериги бошқарувидаги машинаси ўғирлангани ҳақида ёлғон хабар берган.
Расмий ахборотда айтилишича, Чироқчи туманидаги «Дам» МФЙда яшовчи Ҳумоюн Умрзоқов таниши Х.Б билан олдиндан ўзаро жиноий тил бириктириб, бир гуруҳга бирлашиб, 2021 йилнинг 31 августидан 1 сентябрга ўтар кечаси фуқаро М.Э.нинг номига расмийлаштирилган, ўзи фойдаланиб келган «Ваз 2106» русумли 70 V 630 YA давлат рақам белгили автомашинаси ўғирланганини хабар қилган. Аслида эса ўзи машинани шу қишлоқда яшовчи танишининг уйи орқа томонига олиб бориб, очиқ ҳолда қолдирган.
«Сўнгра 102 қисқа рақамига қўнғироқ қилиб, навбатчи операторга гўёки машинаси уйи олдида очиқ ҳолда қолдирилганини, кеч соат 02:00 да автомашинасини номаълум шахслар олиб кетганини баён қилиб, айбдорларга нисбатан қонуний чора кўришни сўраб, жиноят тўғрисида била туриб, ёлғон хабар берган», — дейди «Дарё» мухбири билан суҳбатлашган вилоят ИИБ ахборот хизмати раҳбари Ирода Расулова.
Қайд этилишича, мурожаат бўйича олиб борилган терговга қадар текширув ҳаракатлари давомида «Ваз 2106» русумли 70 V 630 YA давлат рақамли автомашина номаълум шахслар томонидан олиб қочилмагани, аксинча, автомашина аризачи Ҳумоюн Умрзоқов томонидан айбловнинг сунъий далилларини вужудга келтирган ҳолда, яшаш уйидан узоқ жойга олиб бориб қўйилгани аниқланган.
«Мазкур ҳолат юзасидан Чироқчи тумани ИИО ФМБ ҳузуридаги тергов бўлими томонидан Ҳ.У. ва Х.Б.ларга нисбатан Жиноят кодексининг 237-моддаси 2-қисми «а»,«б» бандлари (айбловнинг сунъий далилларини вужудга келтирган ҳолда, ғаразгўйлик ниятида ёлғон ахборот бериш) билан жиноят иши қўзғатилиб, Жиноят процессуал кодексининг 221-моддаси тартибида ушланиб, қамоқ эҳтиёт чораси қўлланган», — дейилади вилоят ИИБ расмий ахборотида.
Ҳозирда Чироқчи тумани ИИО ФМБ ҳузуридаги тергов бўлими томонидан жиноят иши бўйича дастлабки тергов ҳаракатлари давом эттирилмоқда.
«Дарё» мухбири билан суҳбатлашган манбанинг маълумот беришича, блогер Ҳумоюн Умрзоқов, асосан, Чироқчи туманидаги муаммоларни жамоатчиликка олиб чиқиб, танқид қилган.
Изоҳ (0)