Исроилда 6 сентябрь куни эрталаб олти нафар террорчи маҳбус мамлакат шимолидаги Гилбоа қамоқхонасидан қочиб кетди. Бу ҳақда «Korrespondent.net» хабар берди.
Фото: newsru.co.i
Исроил қамоқхона бошқармаси (Шабас) маҳбусларнинг қочиб кетганини тасдиқлади.
Қайд этилишича, узоқ муддатли қамоқ жазосига ҳукм қилинган террорчилар сақланаётган Гилбоа қамоқхонасидан маҳбуслар туннел ёрдамида қочиб кетган. Вертолётлар ва учувчисиз самолётлар ёрдамида полиция ва Шабас бўлинмаларининг йирик кучлари тезкор қидирув эълон қилган. Қидирувга махфий хизматлар ва ҳарбийлар жалб қилинган.
Маҳбусларнинг беш нафари «Исломий жиҳод» террорчилик ташкилотининг фаоллари, олтинчиси эса ФАТҲ террорчиларининг етакчиларидан бири Захария Зубайдий бўлган. Таъкидланишича, айнан Зубайдий қочишни ташкиллаштирган бўлиши мумкин.
N12/Мakо маълумотларига кўра, маҳбуслар ҳожатхона остида туннел қазиган ва канализация йўли орқали қочишга муваффақ бўлган. Гувоҳлардан бирининг сўзларига кўра, қочқинларни маҳаллий деҳқонлар пайқаб қолган ва полицияга қўнғироқ қилган.
Исроил бош вазири Нафтали Беннет ички хавфсизлик вазири Омер Бар-Лев билан воқеани муҳокама қилди ва ҳодисанинг ўта жиддийлигини қайд этиб, хавфсизлик кучлари томонидан «тизимли ҳаракатлар» олиб бориш зарурлигини таъкидлади.
Аввалроқ Нигерияда икки минг маҳбус, Сомалида эса юзлаб террорчилар қамоқхонадан қочиб кетгани ҳақида хабар берилганди.
