АҚШ ўта хавфли глобал террорчилар рўйхатини кенгайтирди

АҚШ давлат департаменти жангари деб тахмин қилинган беш кишини ўта хавфли глобал террорчилар рўйхатига қўшганини эълон қилди. Оқ уй АҚШда жангарилар эгалик қилиши мумкин бўлган мулкларнинг ҳар қандай ҳуқуқ ва манфаатларини чеклашни талаб қилади, деб ёзмоқда Reuters.

АҚШ санкциялари, шунингдек, бу одамлар билан муайян битимлар тузган шахслар ёки хорижий молия институтларига нисбатан қўлланилади. Қора рўйхатга, хусусан, ИШИДнинг Мозамбикдаги бўлинмаси катта ҳарбий қўмондони Бономада Мачуде Омар киритилган. АҚШ давлат котиби Энтони Блинкеннинг сўзларига кўра, Омар шу йилнинг март ойида Мозамбикнинг Палма шаҳрига ҳужум қилиб, ўнлаб одамларни ўлдирган экстремистлар гуруҳига раҳбарлик қилган.

Рўйхатга Омардан ташқари қуйидагилар киритилди: «Ал-Қоида»га алоқадор Малидаги «Жамоат Нусрат ал-Ислом вал-Муслимин» ташкилотининг юқори раҳбарлари Сиданг Хитта ва Салим улд ал-Ҳасан, шунингдек, «Аш-Шабааб» гуруҳининг етакчилари Али Муҳаммад Раге ва Абдуқодир Муҳаммад Абдуқодир.

Аввалроқ «Ал-Қоида» АҚШга қарши «ҳар томондан ҳужум қилиш» билан кенг кўламли уруш бошлашни ваъда қилганди. Террорчилик ташкилоти вакиллари ушбу урушнинг «АҚШ бутун ислом дунёсидан чиқариб юборилгунга қадар» давом этишини қайд этган.