Оғир атлетикада олтин, енгил атлетика ва боксдаги омадсиз серия давом этади. Ўзбекистонлик спортчиларнинг Токио—2020 11-кунидаги натижалари
Япониянинг Токио шаҳри мезбонлик қилаётган Олимпия ўйинларида ўзбекистонлик спортчилар 3 август кунги чиқишларини якунлади.
Енгил атлетика
Уч хатлаб сакраш мусобақасида иштирок этган Руслан Қурбонов саралаш баҳсларида берилган имкониятлардан унумли фойдалана олмади ва мусобақани ҳеч қандай натижасиз якунлади.
Бокс
Рио—2016 Олимпиадаси чемпиони Шаҳобиддин Зоиров (-52 кг) чорак финалда филиппинлик Карло Паламга қарши жанг қилди. Дастлабки раунд филиппинлик боксчининг фойдасига ҳал бўлди. Иккинчи раунд ўтиб бораётган бир вақтда Зоиров жароҳат олди ва жанг муддатидан аввал тўхтатилди. Шу вақтга қадар тўпланган очколар ҳисобига кўра Палам ғолиб деб топилди.
Элнур Абдураимов (-63 кг) арманистонлик Ховханнес Бачковга 0:5 ҳисобида имконияти бой бериб қўйди. -60 кг вазн тоифасида ҳаракат қилган Райҳона Қодирова эса бразилиялик Беатриз Феррейрага қарши ҳеч нарса қила олмади ва чорак финалда ўз юришини тўхтатди.
Шу тариқа Ўзбекистон бокс делегациясида медал учун курашадиган биргина вакил қолди. Баҳодир Жалолов ярим финалда иштирок этадиган ягона ўзбекистонлик бўлади.
Юнон-рум кураши
Рустам Ассакалов (-87 кг) 1/8 финалда грузиялик машҳур курашчи Лаша Гобадзени таслим этиб, чорак финалга чиқди. Ўзбекистон вакили ярим финал учун кечган баҳсда хорватиялик Иван Ҳуклекка ютқазиб қўйди. Ҳуклек финалга чиқа олмади ва Рустам бронза учун курашишдан ҳам маҳрум бўлди.
Шу тариқа юнон-рум курашида Ўзбекистон вакиллари ўз юришини тўхтатди. Тўрт нафар спортчидан ҳеч бири медалга сазовор бўла олмади.
Оғир атлетика
Акбар Жўраев (-109 кг) ўзининг ёрқин чиқиши билан Ўзбекистон делегациясига навбатдаги олтин медални тақдим этди. Жўраев даст кўтаришда 193 кг, силтаб кўтаришда эса 237 кг тошни бўйсундириб, олтин медалга сазовор бўлди. Акбар силтаб кўтариш ва икки кураш (430 кг) бўйича Олимпиада рекордини ўрнатди.
