Шавкат Мирзиёев Тошкент шаҳридаги 21-меҳрибонлик уйига ташрифи давомида соҳада янги тизим яратилиши ҳақида маълум қилганди.
Фото: Президент матбуот хизмати
Президентнинг таъкидлашича, бу тизим орқали келгусида ушбу ўғил-қизлар орасидан «Темурбеклар мактаблари» ўқувчилари ва Жамоат хавфсизлиги университети тингловчилари, Ўзбекистоннинг чинакам посбонлари етишиб чиқади.
«Олий таълим вазирлиги, Туризм ва спорт вазирлиги вилоят ҳокимлари билан бирга, бир ҳафта муддатда ҳар бир меҳрибонлик уйи ва болалар шаҳарчасига 2 тадан олийгоҳ ва спорт мактабини бириктиради.
Жумладан, Юнусобод туманидаги 21-сон меҳрибонлик уйига Ахборот технологиялари университети ва Молия институти, Чилонзордаги 22-сон меҳрибонлик уйига Жаҳон тиллари университети ва Тошкент педагогика университети бириктирилади.
Биргина мисол, Чирчиқ шаҳридаги 14-сонли меҳрибонлик уйида Инха университети билан янги тизим яратилган.
Шу боис бириктирилган ректорлар меҳрибонлик уйларига тарбиячилар тайёрлаш, кутубхона фондини бойитиш, болаларни ахборот технологиялари, хорижий тиллар, аниқ ва табиий фанларга ўргатиш ва уларнинг келгусида олийгоҳларга киришига кўмаклашиш муҳитини шакллантиришга, театр ва концертлар ташкил этишга масъул ва жавобгар бўладилар», – дейди Президент.
Давлат раҳбарининг қайд этишича, олийгоҳларнинг етакчи профессор-ўқитувчилари ҳафтада камида икки кун ушбу тўгаракларга келиб, болаларни ўқитиб беради. Бунинг учун уларга алоҳида устама тўланади.
«Миллий гвардия, Туризм ва спорт вазирлиги спорт федерациялари билан бирга икки ҳафта муддатда меҳрибонлик уйлари тарбияланувчилари учун якка кураш, футбол, сузиш, теннис, шахмат каби спорт тўгаракларини ташкил этади.
Вилоят ҳокимлари бир ой муддатда меҳрибонлик уйларидаги болаларнинг спорт билан шуғулланишлари учун барча шароитларни яратиб бериш, зарур спорт анжомлари билан таъминлашга шахсан масъул бўладилар.
Туризм ва спорт вазирлиги, Миллий гвардия вилоят ҳокимлари билан бирга бир ҳафта муддатда ҳар йили ёз ва қиш мавсумларида меҳрибонлик уйлари тарбияланувчилари ҳамда васийлик, ҳомийлик ва патронатдаги болалар учун Бухоро, Самарқанд, Хива, Шаҳрисабз, Қўқон, Термиз каби қадимий шаҳарларга саёҳат дастурини тасдиқлаб, амалга оширсин», – деди Шавкат Мирзиёев.
Бундан аввал Шавкат Мирзиёев меҳрибонлик уйларини Миллий гвардия масъуллигига ўтказишни таклиф қилгани ҳақида хабар берилганди.
