Ўзбекистон ва Покистон етакчиларининг музокаралари якунлари бўйича 15 июль куни Кўксарой қароргоҳида ОАВ вакиллари учун ўтказилган брифингда Шавкат Мирзиёев ва Имрон Хон Афғонистондаги вазият ҳақида сўз юритди, дея хабар бермоқда «Дарё» мухбири.
«Музокаралар давомида минтақавий хавфсизликни таъминлаш, айниқса, Афғонистонда тинчлик жараёнларига ҳисса қўшишда қандай ҳамкорликни амалга оширишимиз бўйича батафсил фикр алмашдик. Афғонистондаги вазият бизни ниҳоятда хавотирга солади. Умумий мақсадимиз битта – Афғонистон заминида тезроқ тинчлик ва барқарорлик ўрнатишни истаймиз. Бу йўлда қўлимиздан келган ҳамма кўмакни кўрсатамиз.
Барчаларингизни хабарингиз бор, биз икки йилдан бери жуда катта ҳаракатлар қилиб, Термиз—Мозори Шариф—Кобул—Пешовар темир йўли қуриш масаласи бўйича кўплаб қўшни ва ҳамкор мамлакатлар билан атрофлича келишиб олдик. Вазият ниҳоятда оғир, лекин ҳаёт давом этяпти.
Бугун Афғонистон президенти билан уч соатдан кўпроқ мулоқот қилдик, Покистон бош вазири Имрон Хон билан ҳам бу борада суҳбатлашдик. Бизнинг ғоямиз, ташаббусимиз бўлган ушбу йирик лойиҳани амалга оширишда катта келишувларга эришдик», — дейди Шавкат Мирзиёев.
Маълумот учун, Тошкентда 16 июль куни «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусида халқаро конференция ўз ишини бошлади. Президент Шавкат Мирзиёев унда нутқ сўзлаб, тарихий алоқаларни тиклаш муҳимлигини, саъй-ҳаракатларни бирлаштириш фурсати келганини таъкидлаган.
Эслатиб ўтамиз, Шавкат Мирзиёев ва Имрон Хон ўртасида тор ва кенгайтирилган тартибда музокаралар ўтказилди. Музокаралар якунида 8 та ҳужжат имзоланди.
Изоҳ (0)