Ўзбекистон ва Покистон етакчиларининг музокаралари якунлари бўйича 15 июль, пайшанба куни Кўксарой қароргоҳида ОАВ вакиллари учун ўтказилган брифингда Шавкат Мирзиёев ва Имрон Хон Афғонистондаги вазият ҳақида сўз юритди, дея хабар бермоқда «Дарё» мухбири.
Имрон Хоннинг қайд этишича, Афғонистондаги вазият Ўзбекистон ва Покистон учун жудаям ташвишли, катта аҳамиятга эга.
«Биз бугун Афғонистондаги сиёсий ҳолатни ҳар томонлама муҳокама қилдик. Ҳар иккала мамлакат Афғонистон билан қўшни давлатлар ҳисобланади. Шунинг учун ҳам бу мавзу биз учун жудаям ташвишли, катта аҳамиятга эга. Қолаверса, афғон халқи мана 40 йилдирки нотинчлик, жанг-у жадаллардан азият чекиб келяпти.
Бу халқ бизга биродар халқ бўлгани боис сизнинг ҳам, бизнинг ҳам фикрларимиз муштарак бўлдики, Афғонистонда тинчликни ўрнатишга биз сиёсий муроса орқали йўлга қўйишга киришишимиз керак ва бу ягона ечим бўлиши лозим. Ва бу йўналишда Ўзбекистон, Тожикистон, Эрон, Покистон ва Туркия билан фикр алмашиб, бу ишга биргаликда киришишга келишиб олдик. Биринчи қадам сифатида бизнинг ташқи ишлар вазирларимиз бу йўналишда мулоқотларни, муҳокамаларни йўлга қўйсалар, кейинчалик давлат раҳбарлари даражасида саммит ўтказиш ҳам муҳокама қилинди», — дейди Покистон бош вазири.
Аввалроқ Имрон Хон Термиз—Мозори Шариф—Кобул—Пешовар темир йўл лойиҳасига тўхталиб ўтиб, «ўзим ва ҳукуматим бу ғояни амалга оширишда кўмакчи бўламиз», деган эди.
Изоҳ (0)