Қашқадарё вилояти Қамаши туманида 17 ёшли футболчи чўкиб кетиши оқибатида вафот этди. Бу ҳақда туман ҳокимлиги ахборот хизматига таяниб, «Gazeta.uz» маълум қилди.
Хабарга кўра, футболчи Асадбек Тўраев 6 июль куни соат 13:00-14:00 орасида дўстлари билан Чимқўрғон сув омборига чўмилишга борган ва чўмилиш пайтида чўкиб кетган. Дўстлари унинг жасадини қирғоққа олиб чиққан.
Асадбек Тўраев тумандаги 83-мактабнинг 11-синф ўқувчиси бўлган. У тумандаги «Қамаши» футбол клуби ярим ҳимоячиси ҳисобланган. Жамоаси билан биргаликда 12−15 июнь кунлари бўлиб ўтган ДХХ раиси кубогида чемпион бўлган.
Nasafnews’нинг Қамаши тумани ҳокимлиги ахборот хизмати раҳбари Нурбек Расуловга таяниб ёзишича, марҳум йигитнинг жасади экспертизадан ўтказиш учун олиб кетилган.
Бундан аввал Гулистонда Олимпия захиралари коллежининг 16 ёшли талабаси каналга чўкиб кетгани ҳақида хабар берилган эди. У ҳам Дўстлик каналига чўмилиш учун бориб, ўзининг эҳтиётсизлиги оқибатида чўкиб кетиб, вафот этган.
Изоҳ (0)