4-iyul kuni Sirdaryo viloyati Guliston shahrida yosh sportchi yigit kanalga cho‘kib ketdi. Bu haqda viloyat FVB va viloyat prokuraturasiga tayanib, “Sirdaryo xabarlari” nashri xabar berdi.
Ma’lum qilinishicha, haqiqatan 4-iyul kuni taxminan soat 17:30 larda Guliston shahar “Navbahor” mahallasida yashovchi, Olimpiya zaxiralari kolleji 2-bosqich talabasi, 16 yoshli B.A. (o‘g‘il bola) shaharning “Do‘stlik” mahallasi hududidan oqib o‘tuvchi Do‘stlik kanaliga cho‘milish uchun borib, o‘zining ehtiyotsizligi oqibatida cho‘kib ketib, vafot etgan.
“Hozirda Guliston shahar prokuraturasi tomonidan tergovga qadar tekshiruv harakatlari olib borilmoqda”, — deyiladi xabarda.
Avvalroq Urganchda 9-sinf o‘quvchisi shahardan oqib o‘tuvchi kanalda cho‘kib ketgani, Namangandagi Shimoliy Farg‘ona kanalida cho‘kib ketgan 11 yoshli qizning jasadi topilgani, Namanganda kanalda cho‘kib ketayotgan ayol qutqarilgani hamda Buxoroda yana bir maktab o‘quvchisi suvga cho‘kib vafot etgani haqida xabar berilgandi.
