Ўзбекистон Президенти Шавкат Мирзиёев 29 июнь куни Туркманистон президенти Гурбангули Бердимуҳамедов билан телефон орқали мулоқот қилди. Президент матбуот хизматининг хабар беришча, давлат раҳбари Бердимуҳамедовни таваллуд куни билан самимий табриклаб, унга мустаҳкам соғлиқ, бахт-саодат ва катта муваффақиятлар, биродар Туркманистон халқига тинчлик-осойишталик ва равнақ тилади.
Суҳбатда, шунингдек, икки томонлама ва минтақавий ҳамкорликнинг долзарб масалалари кўриб чиқилган.
Олий даражадаги мунтазам ва сермаҳсул мулоқотлар туфайли Ўзбекистон ва Туркманистон ўртасидаги дўстлик, яхши қўшничилик ва стратегик шериклик муносабатлари изчил мустаҳкамланиб бораётгани катта мамнуният билан қайд этилган.
Ўзаро савдо ҳажмини ошириш, саноат, энергетика, қишлоқ хўжалиги, транспорт ва бошқа тармоқларда кооперацияни кенгайтириш, маданий-гуманитар алмашинувни фаоллаштириш борасида биргаликдаги саъй-ҳаракатларни давом эттириш муҳим экани таъкидланди. Ҳамкорлик бўйича янги лойиҳаларни илгари суришда ҳукуматлараро комиссия алоҳида ўрин тутиши қайд этилди.
Президентлар 2021 йилда Туркманистонда Марказий Осиё давлатлари раҳбарларининг навбатдаги маслаҳат учрашувини ташкил этиш масалаларига алоҳида тўхталди. Бўлажак кўп томонлама тадбир дастурини пухта тайёрлашга келишиб олинди. Ўзбекистон Президенти матбуот котиби Шерзод Асадов Марказий Осиё давлатлари раҳбарларининг маслаҳат учрашуви юзма-юз кўринишда ўтказилишини, онлайн формат кўзда тутилмаганини айтганди.
Хабарда айтилишича, президентлар халқаро кун тартиби юзасидан ҳам фикр алмашиб, Афғонистондаги, жумладан, ушбу мамлакат шимолий чегараолди ҳудудларидаги ҳарбий-сиёсий вазиятнинг ривожланишини ҳам муҳокама қилди.
