«Ҳосилбойга бошқа актёр тасдиқланган эди». Фурқат Файзиев «Шайтанат»даги роли ҳақида (видео)

Актёр ва режиссёр Фурқат Файзиев «Дарё» интернет-нашрига эксклюзив интервью берди. Интервьюни «Дарё» мухбири Феруз Муҳаммад ташкиллаштирди.

Фурқат Файзиев суҳбат давомида «Шайтанат» сериалидаги Ҳосилбой роли ҳақида шу вақтгача ҳеч кимга маълум бўлмаган воқеаларни маълум қилди.

Бир куни уйга келсам, онам раҳматли сени Жамшид аканг қидириб келди, дедилар. ‘Қалқон’ студиясига бордим, студия раҳбари Ёдгор Саъдиев эди. Хуллас, шунақа, янги сериал суратга оляпмиз, режиссёр Жаҳонгир Қосимов суратга оляпти. Сен Ҳосилбой ролини ўйнашинг керак, дедилар. ‘Шайтанат’ асари тахминан нима ҳақида эканлигини билардим, аммо ҳали ўқиб чиқмаган эдим.

Озгина вақт беринглар, ўйлаб кўрай, дедим, ўйлашга вақт йўқ, эртага съёмка бошланади, дедилар. Аслида, бу ролни ўйнаши керак бўлган актёр касал бўлиб қолганмиди, қаергадир кетганмиди, хуллас, Ҳосилбой ролини Рустам Уразаев исмли актёр ижро этиши керак эди. Рустам Уразаевни ‘ўзбекистонлик Ален Делон’ дейишарди, озғин, келишган, кўк кўзли актёр эди. Улар ҳозир Россияда яшаб, режиссёрлик қилмоқдалар.

Менга Американинг учта фильми ёқади. Булар Францис Форд Копполанинг фильмлари, ‘Чўқинтирган ота’ фильми, бу фильмдаги Сонни Корлеоне ролидан нимадир олдим, Жаҳонгир Қосимов кўрсатган йўналиш бўйича фикрладим. Хуллас, шундай қилиб Ҳосилбойвачча образи пайдо бўлди.

Ҳосилбой сочини айёрлик билан силаш одати съёмка жараёнида пайдо бўлган. Суратга олиш жараёнида образимга нимадир камдек туюлаверган, охири шу фикр хаёлимга келган ва буни эслаб қолиш керак экан, деганман.

Ҳосилбойвачча терма образ бўлган. Асар муаллифи Тоҳир Малик ҳам бу қаҳрамонингни 4-5 та жиноятчилардан олиб ёзганман, бу терма персонаж бўлган, дегандилар. Мен ҳам бошқа фильм қаҳрамонларидан олганман, кейин ўзимнинг тузилишим бор, ўзимнинг физиологиямни қўшдим. Мана шунақа терма Ҳосилбой пайдо бўлди.

Яхши чиқдими, ёмон чиқдими, билмайман. Бу сериалнинг суратга олинганига йигирма йилдан ошди, томошабинга ҳам маъқул келган экан, демак, биз бекор ишламабмиз.

Фурқат Файзиев, актёр, режиссёр

Фурқат Файзиев «Шайтанат» асари муаллифи Тоҳир Маликнинг сериалдаги Ҳосилбой ролига муносабати қандай бўлганлиги ҳақида гапирди.

‘Шайтанат’ сериалидан олдин биз Тоҳир Малик билан бирга ҳужжатли фильмда ишлаган эдик. ‘Шайтанат’нинг биринчи кунида Тоҳир Малик билан учрашиб, Тоҳир ака, қаҳрамонимга мана бундай ёндашмоқчиман, режиссёр бунақа нарсаларни қўшган, сиз нима дейсиз, деганимда у киши жуда ҳам бир ажойиб гап айтганлар, мен ўзимнинг ишимни қилиб бўлдим, энди сизлар қилинглар, дегандилар.

Фурқат Файзиев, актёр, режиссёр