“Hosilboyga boshqa aktyor tasdiqlangan edi”. Furqat Fayziyev “Shaytanat”dagi roli haqida (video)

Aktyor va rejissor Furqat Fayziyev “Daryo” internet-nashriga eksklyuziv intervyu berdi. Intervyuni “Daryo” muxbiri Feruz Muhammad tashkillashtirdi.

Furqat Fayziyev suhbat davomida “Shaytanat” serialidagi Hosilboy roli haqida shu vaqtgacha hech kimga ma’lum bo‘lmagan voqealarni ma’lum qildi.

Bir kuni uyga kelsam, onam rahmatli seni Jamshid akang qidirib keldi, dedilar. ‘Qalqon’ studiyasiga bordim, studiya rahbari Yodgor Sa’diyev edi. Xullas, shunaqa, yangi serial suratga olyapmiz, rejissor Jahongir Qosimov suratga olyapti. Sen Hosilboy rolini o‘ynashing kerak, dedilar. ‘Shaytanat’ asari taxminan nima haqida ekanligini bilardim, ammo hali o‘qib chiqmagan edim.

Ozgina vaqt beringlar, o‘ylab ko‘ray, dedim, o‘ylashga vaqt yo‘q, ertaga syomka boshlanadi, dedilar. Aslida, bu rolni o‘ynashi kerak bo‘lgan aktyor kasal bo‘lib qolganmidi, qayergadir ketganmidi, xullas, Hosilboy rolini Rustam Urazayev ismli aktyor ijro etishi kerak edi. Rustam Urazayevni ‘o‘zbekistonlik Alen Delon’ deyishardi, ozg‘in, kelishgan, ko‘k ko‘zli aktyor edi. Ular hozir Rossiyada yashab, rejissorlik qilmoqdalar.

Menga Amerikaning uchta filmi yoqadi. Bular Fransis Ford Koppolaning filmlari, ‘Cho‘qintirgan ota’ filmi, bu filmdagi Sonni Korleone rolidan nimadir oldim, Jahongir Qosimov ko‘rsatgan yo‘nalish bo‘yicha fikrladim. Xullas, shunday qilib Hosilboyvachcha obrazi paydo bo‘ldi.

Hosilboy sochini ayyorlik bilan silash odati syomka jarayonida paydo bo‘lgan. Suratga olish jarayonida obrazimga nimadir kamdek tuyulavergan, oxiri shu fikr xayolimga kelgan va buni eslab qolish kerak ekan, deganman.

Hosilboyvachcha terma obraz bo‘lgan. Asar muallifi Tohir Malik ham bu qahramoningni 4-5 ta jinoyatchilardan olib yozganman, bu terma personaj bo‘lgan, degandilar. Men ham boshqa film qahramonlaridan olganman, keyin o‘zimning tuzilishim bor, o‘zimning fiziologiyamni qo‘shdim. Mana shunaqa terma Hosilboy paydo bo‘ldi.

Yaxshi chiqdimi, yomon chiqdimi, bilmayman. Bu serialning suratga olinganiga yigirma yildan oshdi, tomoshabinga ham ma’qul kelgan ekan, demak, biz bekor ishlamabmiz.

Furqat Fayziyev, aktyor, rejissor

‘Shaytanat’ serialidan oldin biz Tohir Malik bilan birga hujjatli filmda ishlagan edik. ‘Shaytanat’ning birinchi kunida Tohir Malik bilan uchrashib, Tohir aka, qahramonimga mana bunday yondashmoqchiman, rejissor bunaqa narsalarni qo‘shgan, siz nima deysiz, deganimda u kishi juda ham bir ajoyib gap aytganlar, men o‘zimning ishimni qilib bo‘ldim, endi sizlar qilinglar, degandilar.

Furqat Fayziyev, aktyor, rejissor